Efemerideak

• 2018-3-16. Iker Bueno Gipuzkoako Saskibaloi Federazioko kirol arduradun izendatu zuten.
• 2018-3-15. Antxieta Arkeologi Taldeak Soreasuko bere egoitza berria inauguratu zuen.
• 2018-3-9. Josu Urbieta 'Pou' azpeitiarra Poitiers-Vivonneko presondegitik (Frantzia) Mont de Marsangora (Frantzia) aldatu zutela jakinarazi zuen Etxerat elkarteak.
• 2018-3-4. Xabier Aranburu 'Guzta' Urrestillako bizilagunak Urrezko Harri-jasotze Txapelketa irabazi zuen, Izarraitz pilotalekuan jokatutako finalean.
• 2018-2-28. Roman Azkuek irabazi zuen Sokamuturra 2018 argazki lehiaketa. Iñaki Joaristi 'Altzarte' saria, berriz, Iñaki Aranbururentzat izan zen.
• 2018-2-21. Olatz Prat izendatu zuen lehendakari Azpeitiko Kultur Mahaiak. Maite Maizen lekukoa hartu zuen Pratek.
• 2018-2-15. Esklabetako komentuaren eraikinean bereziki gazteei bideratutako alokairu sozialeko 45 etxebizitza eraikitzeko akordioa sinatu zuen Udalak Eusko Jaurlaritzarekin.
• 2018-2-10. Europako Giza Eskubideen Auzitegian helegitea aurkeztu zutela jakinarazi zuten Pasaiako segadan hildakoen senideek.
• 2018-2-3. Elikagunea denda ireki eta Azoka Plaza berritua inauguratu zuten.
• 2018-2-2. Absolbitu egin zituzten 2015eko maiatzean Espainiako Auzitegi Nazionalean izan zen epaiketa batean desordena publikoa eragitea eragotzita epaitutako Azpeitiko bi bizilagunak.
• 2018-1-31. Mikel Larrañagak Urrezko Aizkolari Koparen finala irabazi zuen, Asteasun.
• 2018-1-27. Sokamuturraren 500. urteurrena ospatzeko ekitaldi nagusia egin zuten Soreasu antzokian. Bertan estreinatu zuten 'Irteera', Xanti Rodriguezek Jai Karnabaleko zezenaren irteeran oinarrituta egindako film laburra.
• 2018-1-27. Natul euskara elkarteak, Uztarria Komunikazio Taldeak eta Udalak 'Azpeitiarrez Natul' aurkeztu zuten Sanagustin kulturgunean, herritarrek egindako ekarpenekin Azpeitiko hizkeraren hainbat esapide jasotzen dituen liburuxka.
• 2018-1-20. Iker Aizpuruk zilarrezko domina irabazi zuen infantil mailan Igeriketa Egokituko Espainiako Txapelketan.
• 2018-1-19. Arrantzaleak taldeak 50. urteurrena bete zuen helduen danborradan. 1981ean taldearekin danborra jotzen atera ziren lehen emakumeak igo ziren udaletxera omenaldia eta oroigarria jasotzera.
• 2018-1-13. 'Sokamuturra Argazki Lehiaketa' liburua aurkeztu zuen Azpeitiko Argazki Elkarteak Sanagustin kulturgunean, sokamuturraren 500. urteurrenaren bueltako egitarauaren barruan
• 2017-12-31. Hilda aurkitu zuten Pirinioetan Iñigo Larrañaga 24 urteko gazte azpeitiarra. Bezperatik ari ziren haren bila La Mongie (Frantzia) eski estazioaren inguruetan, eskiatzen ari zela desagertu ondoren.
• 2017-12-31. Aitor Mimenzak eta Maite Etxezarretak irabazi zuten San Silbestre lasterketa.
• 2017-12-31. Mikel Larrañagak Urrezko Aizkolari Kopa irabazi zuen, Asteasun jokatutako finalean.
• 2017-12-30. Joxean Etxeberria zigarrak eta Xabier Zaldua zumarragarrak aizkora eta korrika uztartutako apustua jokatu zuten zezen plazan. Aise nagusitu zen Etxeberria.
• 2017-12-30. Mikel Orbeak Euskadiko Ziklokros Txapelketa irabazi zuen, junior mailan.
• 2017-12-27. Iraurgi Saskibaloi Taldeak oroigarria jaso zuen kirol kazetarien Gipuzkoako Kirolari Onenaren ekitaldian.
• 2017-12-20. Ederti dekorazio dendak irabazi zuen VI. Erakusleiho Lehiaketa.
• 2017-12-20. Ignaziotar Lurraldea turismo sustapenerako eta dinamizaziorako proiektuak Europako lekuen bikaintasuna saritzen duen EDEN sarietako bat lortu zuen.
• 2017-12-16. Maite Iriarte pilotariak eta Iker Bueno saskibaloi entrenatzaileak jaso zituzten Azpeitiko 2017ko kirolari onenen sariak.
• 2017-12-13. Epaileak berretsi egin zuen Josu Urbietari Jean-Serge Nerin poliziaren hilketan zerikusia izateagatik ezarritako 16 urteko kartzela zigorra, helegitea ebazteko epaiketan.
• 2017-12-4. Enekoitz Esnaola azpeitiar kazetariak idatzitako 'Luhuso. ETAren armagabetze zibilaren kontakizuna' liburua aurkeztu zuten, Baionan.
• 2017-12-3. Xabier Orbegozo 'Arria V.'-a errezildarrak apustua irabazi zion zezen plazan Xabier Zaldua zumarragarrari, aizkoran eta korrika.
• 2017-12-1. Oier Alkorta eta Eneko Martija azpeitiarrek 22 urtez azpikoen Gipuzkoako gomazko pala finala irabazi zuten.
• 2017-12-1. 'Goldsmithen ikaslea' eleberria kaleratu zuen Joxean Agirrek.
• 2017-12-1. Pello Elorzak idatzitako 'Aberria bihotzean: Azpeitiko EAJren ehun urtetik gorako ibilia' liburua aurkeztu zuten Batzokian, herriko jeltzaleen 110. urteurrenaren ospakizunen barruan.
• 2017-11-30. Zestoako Eromen Produkzioaken 'Hysteria' lanak jaso zuen XXXV. Euskal Antzerki Topaketetako Ikusleen Saria.
• 2017-11-30. Espainiako Gobernuaren EAEko ordezkariak Azpeitiko Udalak Gure Esku Dagori emandako diru laguntzaren aurkako helegitea jarri zuela jakinarazi zuten.
• 2017-11-25. Jose Ignazio Orbegozo 'Arria II'.ari omenaldia egin zioten Izarraitz frontoian, aizkoran egindako ibilbideagatik.
• 2017-11-18. Imanol Arregi 'Iturbide' pandero-jotzailearen 'Iturbide, igitai jolea' biografia liburua eta diskoa aurkeztu zituen Euskal Herriko Trikitixa Ellkarteak. Udaletxeko areto nagusia txiki gelditu zen Amagoia Gurrutxagak idatzitako lanaren aurkezpenean.
• 2017-11-17. Jose Ignazio Orbegozo 'Arria II'.aren biografia aurkeztu zuten udaletxean, Joseba Urretabizkaiak idatzia.
• 2017-11-10. Azpeitia eta Urrestilla arteko bidegorria egiteko lanak 2018an egingo zituztela iragarri zuten Azpeitiko Udalak eta Gipuzkoako Foru Aldundiak.
• 2017-11-3. Ezkurra II.ak eta Ionek irabazi zuten Azpeitiko XVIII. Erremonte Txapelketa, finalean Etxeberria IV.a eta Endika 40-26 garaituta.
• 2017-11-3. Kataluniako Gobernuko hainbat kideren espetxeratzea gaitzetsi zuten Udalak eta 300 inguru herritarrek, plazan egindako elkarretaratzean.
• 2017-10-31. 8c solido mailako Orbayu igotzea lortu zuen Gorka Karapeto azpeitiarrak Picu Urriellun (Asturias, Espainia).
• 2017-10-28. Oihana Azkorbebeitiak eta Eneko Zarrabeitiak irabazi zuten VIII. Kros Mistoa.
• 2017-10-28. Jonathan Terronek urrezko domina irabazi zuen Benidormen (Herrialde Katalanak) jokatutako Europako II. Brazilian Jiu-Jitsu Txapelketan.
• 2017-10-24. Seamus Heaneyren poema antologiaren itzulpena aurkeztu zuen Xabi Bordak, Munduko Poesia Kaierak proiektuaren barruan.
• 2017-10-24. Pasaiako segadan oinarritutako 'Pasaiako badia' dokumentala estreinatu zuten Xabier Otamendi, Yuri Agirre eta Erik Aznal azpeitiarrek Iruñeko Golem Baiona zinema aretoan.
• 2017-10-23. Fiskalak 13 urte eta 6 hilabeteko espetxe zigorra eskatu zuen Eneko Ibargurenentzat. Herrirako kidea zen Ibarguren, eta 2013ko irailaren 30ean atxilotu zuen Guardia Zibilak, elkarte horren aurka egindako operazioaren barruan.
• 2017-10-22. Iñaki Aiertzak irabazi zuen autoen Urrakiko XXXV. Igoera. Urrakin txapela jantzi zuen lehen azpeitiarra izan zen.
• 2017-10-18. Soreasuko Sormen Gunearen aurreproiektua aurkeztu zuten jendaurrean.
• 2017-10-16. Iñaki Errazkin Ingurumen diputatu ohi azpeitiarra auzitara eramatea erabaki zuen Gipuzkoako Hondakinen Kontsortzioak (GHK), Ainhoa Intxaurrandieta kontsortzioko aurreko lehendakariarekin batera, erraustegiaren lanak gelditzeagatik.
• 2017-10-15. Mikel Larrañagak hirugarren egin zuen Euskal Herriko Lehen Mailako Aizkora Txapelketako finalean, Donostian.
• 2017-10-11. Xiriako Gurrutxaga nuarbetar puntista ohia hil zen.
• 2017-10-4. Esklabetan gazteei zuzendutako alokairu sozialeko 45 etxebizitza eraikitzeko hitzarmena sinatu zuten Azpeitiko Udalak eta Eusko Jaurlaritzak.
• 2017-9-25. Basanderiek Azpeitiko Emakume Gazteen Talde Feministak lehen batzarra egin zuen.
• 2017-9-24. Saskibaloiko Euskal Kopa irabazi zuen Sammic ISBk, Araberri 76-62 mendean hartuta, herriko kiroldegian.
• 2017-9-23. Azpeitiaren eta Hazparneren arteko senidetzaren 30. urteurrena ospatzeko egun osoko festa ospatu zuten Lapurdiko herrian.
• 2017-9-21. Kataluniari babesa adierazteko eta "jasaten ari diren jazarpena salatzeko" adierazpena onartu zuen Udalak, urriaren 1eko galdeketaren atarian.
• 2017-9-21. Migel Angel Elustondok (H)Ilbeltza beka irabazi zuen, urtebeteko epean eleberri beltz bat egiteko.
• 2017-9-18. Azoka Plazako Elikagune berriaren kudeaketa Artxara kooperatiba elkarte txikiari esleitu ziola jakinarazi zuen Udalak, hamar urterako emakidarekin.
• 2017-9-3. Artzain aipagarrienari egindako omenaldia jaso zuen Premietxeberri baserriak Legazpiko Artzain Egunean.
• 2017-8-27. Jorge del Cid auto gidariak eta haren kopilotu Nerea Odriozolak Lanzaroteko rallya irabazi zuten, Lur Gaineko Espainiako Rally Txapelketaren barruan.
• 2017-8-25. 50 urteko langile bat hil zen Glual Energy enpresan, lan istripuan.
• 2017-7-22. Oier Ibarguren txirrindulari azpeitiarrak Orthezeko Klasika (Okzitania) irabazi zuen.
• 2017-7-22. 'Sagardoa Azpeitian' liburua aurkeztu zuten, Laxaro Azkunek idatzia eta Juan Joxe Agirreren argazkiekin osatutakoa.
• 2017-7-21. Azpeitiak hirugarren aldiz irabazi zuen Euskal Herriko Herriarteko pilota txapelketa, Usansolo 3 eta 0 gaindituta, Larrabetzun (Bizkaia).
• 2017-7-14. Basazabal jauregia birgaitzeko proiektua 200.000 eurorekin laguntzea hitzartu zuen Gipuzkoako Foru Aldundiak Azpeitiko Udalarekin.
• 2017-7-5. Izarraizko Atea parkea inauguratu zuten. Esklabetako eraikinaren eta Azpeitiko Ikastola Ikasberriren artean, Jesus eta Maria komentuaren atzekaldean, 18.000 metro karratuko eremuan eraiki zuen Udalak aisialdirako berdegunea, bere jabetzako lurretan.
• 2017-7-3. Laneko istripuan hil zen Iñigo Etxaniz Epelde, 50 urterekin, Astigarraga Kit Line enpresan.
• 2017-7-1. Itsasiren 40. urteurrena ospatzeko ekitaldiarekin hasi zen Azpeitia Dantzan.
• 2017-7-1. Soka luzea ekarriko zuen apustua jokatu zuten zezen plazan Mikel Larrañaga azpeitiarrak eta Alex Txikon lemoarrak, harri-jasotzen, aizkoran eta korrika. Txikon erretiratu egin zen eta Larrañagak irabazi zuen desafioa.
• 2017-7-1. Azpeitiak seigarren txapela irabazi zuen Gipuzkoako Herriarteko pilota txapelketan, hirugarrena jarraian, Donostiako Atano III.a frontoian Oiartzuni 3 eta 0 irabazita.
• 2017-6-20. Valen Garciak irabazi zuen XXXV. Euskal Antzerki Topaketen kartek lehiaketa.
• 2017-6-17. Gerra Zibilaren garaian eta ondorengo urteetan Gernikako hilerrian lurperatu zituzten Eusko Gudarosteko 82 gudariei aitortza egin zieten hainbat erakundetako ordezkariek. Azpeitiko lau gudari hobiratu zituzten han: Francisco Iparragirre Orbegozo (Itxarkundia batailoia), Jose Urbieta Etxezarreta (Loiola batailoia), Urrestillako Dionisio Urbistondo Lasa (Loiola batailoia) eta Leandro Plazaola Zubizarreta (San Andres batailoia).
• 2017-6-15. Arkupehotsak egitasmoa aurkeztu zuen Kulturaz kooperatibak, Sanagustingo oholtza txikiaren bidez musika sortzaile hasiberriei "plaza duin bat" eskaintzeko helburuarekin.
• 2017-6-13. Gorka Karapeto eskaladako euskal selekzioko hautatzaile izendatu zuten.
• 2017-6-13. Sammic ISBko Iker Bueno urteko entrenatzailerik onena izendatu zuten Espainiako Zilarrezko LEB mailan.
• 2017-6-6. Urola Lanbide Eskola izena hartu zuen Azkoitia-Azpeitia BHIko lanbide heziketak.
• 2017-6-3. Joseba Albizuk BTT Ultramaratoiko Espainiako Txapelketa irabazi zuen.
• 2017-5-17. Euskarazko Internet Egunaren bigarren edizioa Azpeitian ospatu zuten, PuntuEus Fundazioak eta Kulturaz kooperatibak antolatuta.
• 2017-5-12. Gorka Azkunek dibulgazio-artikulu onenaren saria jaso zuen CAF-Elhuyar Zientzia Dibulgaziorako sarietan, 'Intuizioaren bide ilunak argitzen' lanarekin.
• 2017-5-7. Manuel Solak (Caja Rural) irabazi zuen txirrindularien XLVII. Urrakiko Igoera.
• 2017-5-5. Azpeitiko lehendabiziko liburutegi libreak aurkeztu zituzten. Sanagustinpean, kiroldegian, igerilekuan eta Jose Artetxeko bi autobus geltokietan jarri zituzten liburuak trukatzeko guneak Udalak eta Udal Liburutegiak.
• 2017-5-3. Inaxio Uria hiltzea leporatuta, 44na urteko espetxe zigorra ezarri zieten Beñat Aginagalde eta Joanes Larretxea ETAko kideei.
• 2017-4-30. Joxe Aierberen marka hautsi zuen Xabier Orbegozo 'Arria V'.ak Azpeitiko zezen plazan. Errezildarrak 2 ordu, 9 minutu eta 27 segundo behar izan zituen 20 kana erdiko enbor ebakitzeko eta 20 kilometro korrika egiteko.
• 2017-4-30. Aritz Kortabarriak eta Oihana Azkorbebeitiak irabazi zuten XIII. Izarraizko Mendi Lasterketa.
• 2017-4-29. Ionek eta Otaegik erremonteko VII. Sagardoaren Txapelketa irabazi zuten.
• 2017-4-26. Miren Garate kazetari azpeitiarrak 'Ekaitzaren zipriztinak' liburua aurkeztu zuen, Tene Mujika beka jaso ondoren idatzitakoa.
• 2017-4-16. Espainiako Urrezko LEB Mailara igo zen Sammic ISB saskibaloi taldea, ligako azken aurreko neurketan Carrefour El Bulebar de Avila etxetik kanpo 45 eta 60 mendean hartu ondoren.
• 2017-4-7. Korporazio irudi eta webgune berritua aurkeztu zituen Udalak.
• 2017-4-5. Ehunka azpeitiarrek egin zuten bat herritik goizaldean igaro zen 20. Korrikarekin.
• 2017-4-1. Joseph Kiptumek eta Desi Jisak irabazi zuten XXIV. Azkoitia-Azpeitia maratoi erdia.
• 2017-3-26. Jaime Amenabar omendu zuten Julian Barrenetxeakoek, 17 urtez abesbatza zuzentzen ibili ostean batuta utzi ondoren.
• 2017-3-26. Antxieta arkeologia taldeko kideek labar artea aurkitu zuten Debako Arbil V kobazuloan.
• 2017-3-25. Azpeitian egin zuten Gipuzkoako Jubilatuen Topaketa.
• 2017-3-25. Ekonomia Feminista Foroa egin zuten herrian, Euskal Herriko Bilgune Feministak antolatuta.
• 2017-3-18. Jon Guridi futbolariak lehen partida ofiziala jokatu zuen Realarekin, Gasteizen, Alavesen kontra.
• 2017-3-14. Pasaiako segadaren auzia artxibatzearen aurka Espainiako Auzitegi Konstituzionalean babes helegitea jarri zuela jakinarazi zuen Udalak.
• 2017-3-12. Imanol Goñik eta Oihana Azkorbebeitiak irabazi zuten IX. Zuzenien mendi lasterketa.
• 2017-3-10. Lagun Onak Futbol Taldeak Iñigo Arregi buru zuen zuzendaritza berria aurkeztu zuen.
• 2017-2-25. Valentin Bengoa jesuita eta sindikalista hil zen. Aretxabaletakoa, ELA sindikatuko historikoetakoa izan zen, 50 urte pasa egin zituen Loiolako jesuiten etxean eta, besteak beste, Ikastolaren alde lanean aritu zen Azpeitian.
• 2017-2-21. Urkome Urola Kostako Landa Garapen Elkarteak 30. urteurrena ospatzeko ekitaldia egin zuen Sanagustin kulturgunean.
• 2017-2-19. Jabier Bergara omendu zuten Udal Musika Bandaren karnabaletako kontzertuan, Bandan betetako 65 urteko ibilbideagatik.