2020-7-9. Donostiako Administrazioarekiko Auzien Epaitegiko epaile batek baliogabetzat jo zuen Urola Erdiko Mankomunitateak, Lapatx Zabortegiak eta Azpeitiko Udalak 2015eko abenduan sinatutako hitzarmen bat. Horrenbestez, Azpeitiko Udalak 3.850.000 euro itzuli behar zizkion Lapatx Zabortegiari.
2020-7-4. Xaguxatar ibilbidea aurkeztu zuen Azpeitiko Udalak.
2020-7-3. Jose Maria Gibertek Deustuko Unibertsitateko errektore kargua berritu zuen beste hiru urterako.
2020-7-1. Esklabetan alokairu sozialeko etxebizitzak egiteko ia 6,5 milioi euroko inbertsioa onartu zuen Jaurlaritzak.
2020-7-1. Etumeta baserriko artegiko suteak eragindako kalteak arintzeko elkartasun kanpaina jarri zuten martxan.
2020-6-29. Urola ibaiaren ur-masak egoera ekologiko eta kimiko "ona" zuela jakinarazi zuen Ura agentziak.
2020-6-18. Esklabak-Iturtzulo eremuko bigarren faseko etxebizitzak zozkatu zituzten.
2020-6-13. Lurrikara txiki bat izan zen Azpeitia eta Errezil artean.
2020-6-1. Julen Belamunok 'Hotz industriala' liburua aurkeztu zuen.
2020-5-26. Bizikletak garbitzeko gunea jarri zuten erabilgarri Garmendikampen.
2020-5-22. Autobus batean Patxi Ruiz presoaren aldeko pintaketak egin zituzten ezezagunek.
2020-5-13. COVID-19aren pandemia tarteko, Azpeitiko Udala maskara berrerabilgarriak banatzen hasi zen.
2020-5-7. Deñe Garcia-Bravo Gaztea irratiaren Maketa Lehiaketaren finalera sailkatu zen.
2020-4-26. 14 urtetik beherako umeei eta gaztetxoei ordubetez kalera ateratzeko aukera eman zieten.
2020-4-21. San Martin egoitzako langileei PCR probak egiten hasi ziren.
2020-4-16. Azpeitiko anbulatorioan COVID-19a detektatzeko PCR testak egiten hasi ziren.
2020-4-3. COVID-19 gaitzak eraginda, ekonomikoki egoera zailean dauden herritarrak babesteko 362.000 euroko dirulaguntza lerroa zabaldu zuen udalak.
2020-3-30. Funtsezkoak ez diren jarduera guztiak bertan behera utzi zituzten.
2020-3-27. "Osasuna, lan baldintzak eta enplegua defendatzeko", Haserre Eguna antolatu zuten ELA, LAB, ESK, Steilas, Etxalde eta HIRU sindikatuek.
2020-3-16. Bertan behera utzi zituzten apirilaren 5era deituta zeuden Eusko Legebiltzarrerako hauteskundeak.
2020-3-15. Espainiako Gobernuak konfinamendua ezarriko zuen herritar guztientzako.
2020-3-14. Koronabirusaren aurrean, herritar ahulenak babesteko boluntario sarea jarri zuen martxan Azpeitiko Udalak.
2020-3-13. Koronabirusa zela eta, osasun larrialdi egoera deklaratu zuen Eusko Jaurlaritzak, eta eskolak itxi zituen. San Martin egoitzako bisitak eten zituzten, kultur ekitaldiak eta kirol jarduerak bertan behera utzi zituzten...
2020-3-13. 'Ataraxia' disko berria plazaratu zuen Trini Fox musika taldeak.
2020-3-10. Pako Aristiren 'Euskal kantagintza berria' liburua berrargitaratu zuten.
2020-3-10. Joxe Anjel Aristi udaltzainburuak erretiroa hartu zuen, eta aitortza egin zion udalak.
2020-3-8. Beasaingo Herri Lasterketa irabazi zuen Aitor Mimenzak.
2020-3-7. Urrezko Binakako Aizkolari Txapelketa irabazi zuen Mikel Larrañagak, Izarraitz pilotalekuan.
2020-2-25. Maider Etxezabalek urrezko bi eta zilarrezko domina bat irabazi zituen Munduko Sokatira Txapelketan
2020-2-24. Sutea izan zen Txokoa erretegian.
2020-2-23. Unai Alberdi pilotariak Soroaren Oroimenezko Txapelketaren VIII. edizioa irabazi zuen.
2020-2-22. Aitor Zubillaga atletak urrea lortu zuen pista estaliko Euskadiko Txapelketan.
2020-2-22. Gimnastika Erritmikoko Euskadiko Bakarkako Txapelketa jokatu zuten Azpeitian.
2020-2-20. Elmubas enpresa handitzeko obrak hasi zituzten.
2020-2-15. 2019ko Euskal Automobilismo Txapelketako sariak banatu zituen Euskadiko Automobilismo Federazioak Lazkaon (Gipuzkoa), eta Iñaki Aiertza, Joseba Bikendi, Jokin Aiertza eta Aratz Aizpuru saritu zituzten.
2020-2-14. Pako Epelderi omenaldia egin zioten Azpeitiko Parrokian egindako lanagatik.
2020-2-14. Joxe Mari Auzmendi hil zen, Azpeitiko unitate didaktikoen sustatzaileetakoa.
2020-2-12. Azpeitiko Udalak zortzi urtez Janari Bankuan egindako lana aitortu zien zortzi herritarri.
2020-2-7. Landaola saria jaso zuen Azpeitiko Udalaren Aratzerrekako ura garbitzeko sistema naturalaren proiektuak.
2020-2-7. Joxin Iriarte Azpeitiko Zezenzale Batzordearen presidenteak "toreatzaile baten ibilbidean eragin handiena izan duen pertsonari" eskainitako saria jaso zuen Santanderren (Kantabria, Espainia).
2020-2-3. Esklabak-Iturtzulo eremuko etxebizitzak eraikitzeko obrak hasi zituzten.
2020-1-31. Elkar-ekin taldeak, 'Gure Zirkua' ikuskizunak eta Egunean Behin jokoak aipamena jaso zuten 2020ko Argia sarietan.
2020-1-30. Euskal Herriko Eskubide Sozialen Kartak deituta, greba orokorra egin zuten, lana, pentsioa eta eskubide sozialak aldarrikatzeko.
2020-1-26. Euskal Nekazarien Batasunaren Baserritarron Laguna saria jaso zuen Nikolas Segurola artzainak.
2020-1-19. Uztarriak, Erlo Telebistak eta Urola Kostako Hitzak San Sebastian bezperako festaren zuzeneko emanaldia egin zuten lehen aldiz.
2020-1-19. Pastoraltza eta Nagusilan taldeetako boluntarioak omendu zituen Azpeitiko Udalak, San Sebastian bezperako danborradan.
2020-1-19. Helduen danborradan, hiru talde berri atera ziren estreinakoz: Ilunpe, Inpernue eta Izarraitzpe.
2020-1-9. Azpeitiko Kantujira taldeak abestien liburuxka kaleratu zuen, 300dik gora abestirekin.
2020-1-5. Lagun Onak futbol klubak 'Izen eta izan' ipuina aurkeztu zuen, Garmendipen.
2019-12-29. Anjel Larrañaga eta Xabier Alberdi 'Zabale' Azpeitiko bizilagunek eta Jexux Epeldek osatutako Kupela taldeak agurreko kontzertua eman zuen Aristerrazun.
2019-12-28. Espainiako Zilarrezko LEB Mailako Kopako finala irabazi zuen Juaristi ISBk, Gironaren aurka, Azpeitiko kiroldegian.
2019-12-21. Xanti Agirrezabalak XXXVII. Antzerki Topaketetako ikusleen saria jaso zuen, 'Satiro' antzezlanari esker.
2019-12-19. Bascotecnia-LagunArtea enpresa erosi zuen Sarralle Taldeak.
2019-12-16. Iñaki Errazkin Ingurumen diputatu ohi azpeitiarraren eta Ainhoa Intxaurrandieta kontsortzioko presidente ohiaren aurka zigor espedientea irekitzea onartu zuen Gipuzkoako Hondakinen Kontsortzioak, errauste planta gelditzeagatik.
2019-12-14. Beñat Lizasok Gipuzkoako Bertsolari Txapelketako finala jokatu zuen lehen aldiz, eta zazpigarren sailkatu zen.
2019-12-14. Julen Lopetegi eta Vanesa Cerrajero triatletek eta Ilunpe pilota elkarteak jaso zituzten 2019ko Kirol Sariak, Basazabal jauregian.
2019-12-14. Egunean Behin jokoaren lehen aurrez aurreko finala jokatu zuten 150 lagunek, Sanagustin kulturgunean.
2019-12-9. Itziar Sagarzazu hil zen, Loiolako Herri Irratiko esatari izandakoa.
2019-12-5. Sakona Etxaldeak eta Jaki-Saski proiektuak Urkome sariak jaso zituzten.
2019-12-4. Aitor Expositoren proiektua aukeratu zuen epaimahaiak sansebastianetako haurren danborradako karroza egiteko.
2019-11-29. 'Bigarren sexua(z). Collage' izeneko film laburra aurkeztu zuen Nora Alberdik, Iratxe Fresnedarekin batera.
2019-11-29. Iñaki Elorza 'Txapas'-ek Ohorezko Aipamena jaso zuen Rikardo Arregi Sarietan.
2019-11-28. Lagun Onak futbol klubaren 75. urteurreneko liburua aurkeztu zuten.
2019-11-22. Uztarria Komunikazio Taldeak aldizkariaren 20. urteurreneko ekitaldia egin zuen, Sanagustin kulturgunean.
2019-11-22. Olatz Pratek Ngugi wa Thiong'o idazle kenyarraren 'Gerra garaiko ametsak' euskaratu zuen, eta Donostian egin zuen lanaren aurkezpena.
2019-11-21. Jose Mari Azpiazuk 'La vida en los confines de la Tierra' (Bizitza Lurraren ertzetan) liburua aurkeztu zuen Madrilen.
2019-11-20. Frankismo garaiko giza eskubide urraketak biltzen dituen liburua aurkeztuko zuten, udaletxean.
2019-11-19. Maria Angeles Amenabarrek Korta saria jaso zuen Gasteizen, Iñigo Urkullu lehendakariaren eskutik.
2019-11-16. Lehen aldiz, herri hezitzailearen filosofiarekin bat eginda egin zuten Kros Mistoa, eta era askotako bikoteek parte hartu zuten egitasmoan.
2019-11-15. Uztarriak diploma jaso zuen IV. Tokikom Sarietan.
2019-11-7. Espainiako Kimika Elkartearen saria jaso zuen Iñaki Bastida kimikariak, Valentzian (Herrialde Katalanak) egindako Kimika Ikerlari Gazteen XVI. Sinposioan.
2019-10-25. Caja Rural-Seguros RGA taldeak Oier Ibarguren txirrindularia fitxatu zuen.
2019-10-13. Mirari Uriak Realaren talde nagusiarekin egin zuen debuta.
2019-10-12. Mikel Larrañagak Urrezko Aizkolarien Liga irabazi zuen Urrestillako Txikuri pilotalekuan jokatutako finalean.
2019-10-8. Iñaki Alberdi bandako klarinete-jotzailea hil zen, 84 urterekin.
2019-10-3. Lapatxeko konpostatze planta behin betiko ixtea onartu zuen Gipuzkoako Hondakinen Kontsortzioak.
2019-10-3. Alaitz Olaizolak 'Nork agintzen du?' liburua aurkeztu zuen Donostian.
2019-9-28. Maider Etxezabalek Euskal Herriko Lokotx Bilketa Txapelketa irabazi zuen Igantzin (Nafarroa).
2019-9-19. Nagore Alkorta Eudeleko presidenteorde izendatu zuten Elgoibarren (Gipuzkoa).
2019-9-11. Hitzaren Eskolarekin ireki zituen ateak Dinamoa sormen guneak.
2019-9-8. Juaristi ISB taldeak Euskal Kopa irabazi zuen Delteco GBCren aurka.
2019-8-31. Agerraldi jendetsua egin zuten Sanagustin kulturgunean 11/13 sumarioko auzipetuen alde.
2019-8-30. Irudi Onenaren Saria jaso zuen Xanti Rodriguezen 'Lekaime' filmak Veracruz Short Film jaialdian.
2019-8-21. Kohlberg Kravis Roberts (KKR) Ipar Amerikako inbertsio funtsak Gallardo Balboa Taldea erosi zuen, eta funts horrek eskuratu zituen Corrugados Azpeitia eta Corrugados Lasao.
2019-8-18. 68 urteko gizon bat hil zen Oñatz auzoan, baserri bateko itxituratik ihes egin zuen zezen batek kolpatu ostean.
2019-7-24. Amets Amubietak eta Larraitz Larrañagak dantza sueltoko Gipuzkoako Txapelketa irabazi zuten, hirugarrenez, Errenterian.
2019-7-24. Ertzaintza hilketa gisa ikertzen hasi zen bezperan herriko baserri batean jazotako ume baten heriotza.
2019-6-29. BTT ultramaratoiko Europako txapelketan zilarra lortu zuen Joseba Albizuk Vielhan (Lleida, Katalunia).
2019-6-29. Azpeitiak 1 eta 2 galdu zuen esku-pilotako Gipuzkoako Herriartekoaren finala Astigarragaren kontra, Donostiako Atano III.a pilotalekuan.
2019-6-29. Oier Ibarguren txirrindulariak brontzezko domina eskuratu zuen errepideko Espainiako txirrindularitza txapelketan, 23 urtez azpikoetan, Murtzian (Espainia).
2019-6-25. Azpeitiko Elmubas enpresa erosi zuen Portobello Capitalek.
2019-6-24. Julen Egiguren pilotariak profesionaletan debuta egin zuen. 22 eta 13 nagusitu zen azpeitiarra, Zabaleta bikote zuela, Zabalaren eta Martijaren aurka Eibarko Astelena pilotalekuan.
2019-6-17. Elena Marguellok irabazi zuen Euskal Antzerki Topaketen kartel lehiaketa.
2019-6-16. Pablo Etxeberriak Ur Irekietako Espainiako Txapelketa irabazi zuen Master+20 mailan, Banyolesko (Girona, Katalunia) lakuan.
2019-6-15. Nagore Alkortak, Azpeitiko lehen emakume alkateak, aginte makila jaso zuen Eneko Etxeberriaren eskutik, 2019-2023 agintaldiko udal berria eratzeko udalbatzarrean.
2019-6-14. Parrokiako Bakardadearen kaperaren historia jasotzen duten liburu dibulgatiboa eta tesia aurkeztu zituen Miren de Miguel ikerlariak, kaperan bertan.
2019-6-7. Rafael Rezabal eta Andoni Albizuri 'Katxo' zena omendu zituzten Donostiako Viktoria Eugenia antzokian, bi azpeitiarrek Ekain kobazuloa aurkituko zuteneko 50. urteurrena ospatzeko ekitaldian.
2019-5-27. EH Bilduk gehiengo osoa berretsi zuen udal hauteskundeetan, Nagore Alkorta zerrendaburu berriarekin. Koalizioak botoen %57,11 lortu zituen (4.489 boto). EAJk, berriz, bozen %38,49 jaso zituen; 3.025 boto. Bi alderdi horien ordezkariekin osatuko zuten 2019-2023 agintaldiko udalbatza.
2019-5-25. Iraurgi SBren Txintxu Gozotegia emakumeen bigarren taldea Euskal Ligara igo zen.
Imanol Eliasek 2003ko abenduan aurkeztu zuen Azpeitiko Efemerideak liburua. Geroztik, Uztarria Komunikazio Taldeak hartu du efemerideen datu-basea osatzeko ardura. Efemeride guztiak, hemen dituzue kontsultagai. Informazio gehiago