Sañu Bizirik taldeak gonbidatuta, Eva Fjellheim Azpeitian izango da asteazkenean. Fjellheim ikertzailea eta ekintzailea da, eta baita Sami Kontseiluko kidea ere. Sami herriak urteak daramatza beraien bizimoduan eragin zuzena izan duten megaproiektu eolikoen aurka borrokan, eta, hain zuzen ere, Statkraft enpresa norvegiarra dago proiektu horietako hainbaten atzean, Sañoan Piaspe proiektua eraikitzeko interesa azaldu duen enpresa bera.
Sami lurraldeko kolonialismo berdea, energia eolikoa eta justizia klimatikoa izenburupean, Azoka Plazako aretoan emango du hitzaldia Fjellheimek, asteazkenean, 19:00etan hasita.