Kulturaz kooperatibak beste bi kontzertu iragarri ditu datozen asteetarako: McOnak taldearen emanaldia izango da otsailaren 11n, zapatua, Sanagustin kulturgunean, eta Kalakan zein Alexander Arkhintxeev izango dira Soreasu antzokiko agertokian martxoaren 5ean, igandez. McOnakek eskainiko duen zuzenekoa doakoa izango da; Kalakanen kontzerturako sarrerak, berriz, Kulturaz.eus webgunean eskura daitezke.
Kaldereroen konpartsa izango da otsailaren 11n herrian, eta hain zuzen ere, horregatik antolatu dute McOnaken kontzertua. 23:00etan hasiko da Lekeitioko rebel folk taldearen emanaldia. Taldea hamargarren urteurrena ospatzen ari da, eta Bitakora diskoa plazaratu du. Kalakanen emanaldia berezia izango da; izan ere, Arkhintxeev Siberiako kantari difonikoarekin izango da agertokian, 17:30ean hasita.