Hanburgesa lehiaketa eta dastaketa egingo dituzte zapatuan

Egitasmoaren sustatzaileak. (Azpeitiko Udala)

Gipuzkoako I. Hanburgesa Artisau Lehiaketa izango da 18:00etan hasita Azoka Plazan, eta 22 harakinek eman dute han parte hartzeko izena. Gainera, 18:00etatik aurrera, hanburgesak eta garagardo artisauak dastatu ahal izango dira plazan –garagardoa 12:00etatik 14:30era bitartean ere bai–. Egitasmoan bildutako dirua gerrak kaltetutako pertsonentzako materiala erostera bideratuko dute.

Hanburgesa eta garagardo artisau zaleek hitzordu berezia dute zapatuan herrian, Azpeitiko Udalak, Ederto Gipuzkoako harakinen elkarteak eta Dendartean Gipuzkoako merkatari elkarteen bilkurak antolatuta. Izan ere, Gipuzkoako I. Hanburgesa Artisau Lehiaketaren harira, hanburgesak ez ezik, askotariko garagardo artisauak dastatzeko aukera izango dute herritarrek.

Batetik, Gipuzkoako hanburgesa haragi onena izendatuko dute egun horretan. Oraingoz, lurraldeko 22 harategik eman dute lehiaketan parte hartzeko izena. Epaimahaiak hanburgesaren itxura, testura, kolorea, zaporea, bertakotasuna nahiz produktuen konbinazioa baloratuko ditu. 18:00etan hasita egingo dute lehiaketa Azoka Plazan.

Bestetik, lehiaketa tarteko, herritar guztiek izango dute hanburgesak dastatzeko aukera, 18:00etatik aurrera. Banatuko dituzten hanburgesak lehiaketara aurkeztutako okelarekin eginak izango dira, eta ogi artean eta bakoitzak nahi dituen osagaiekin –gazta, tipula potxatua, ketchupa, mahonesa...– zerbitzatuko dituzte horiek. Janariaren osagarri gisa, garagardo artisauaz ere gozatu ahal izango dute herritarrek. Izan ere, Euskal Herriko bost garagardo ekoizleren produktuak izango dira dastagai: Atala Brewing, Baobeer, Iparra, Mitika eta Izar-Haitz. Gainera, arratsaldean ez ezik, garagardo horiek probatzeko aukera izango da 12:00etatik 14:30era bitartean ere.

Lehiaketak nahiz dastaketak ikuspuntu solidarioa izango dute horien sustatzaileek azaldu dutenez. Izan ere, biltzen duten dirua gerrak kaltetutako pertsonentzako materiala erostera bideratuko dute. "Bertako harakinen zein garagardo ekoizleen produktuak ezagutuz, gerraren gordintasuna pairatzen dutenei iritsiko zaie ekarpena". Antolatzaileen arabera, Ardo Egunaren antzeko formatua izango du egunak, eta adierazi dute festa giroa ziurtatuta izango dela. Hori dela eta, herritarrei larunbatean plazara joateko deia egin diete, eta eskerrak eman dizkiete egitasmoa lagundu duten Errotaundi okindegiari eta Deuko Izarra enpresari.

Txartel bat, euro bat

Hanburgesak nahiz garagardoak dastatzeko ordaindu egin beharko da. Hain zuzen ere, euro batean salduko dituzte txartelak, eta antolatzaileek azaldu dutenez, hanburgesa bat hiru txartelen trukean eskuratu ahal izango da, hau da, hiru eurotan. Garagardo bakoitzak, berriz, bere prezioa izango duela aurreratu dute.

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide