Juaristi ISBk mailari eusteko "hil ala biziko" derbia jokatuko du bihar Acunsa Gipuzkoaren kontra

Juaristi ISBren partida bat, Azpeitiko kiroldegian. (Argazkia: Mikel Amenabar Otola)

Espainiako Urrezko LEB ligako Gipuzkoako bi saskibaloi taldeen arteko derbia jokatuko da bihar, igandea, 18:00etan, Azpeitiko kiroldegian. Nor baino nor ariko dira Juaristi ISB eta Acunsa Gipuzkoa Basket.

Juaristi ISBk eta Acunsa Gipuzkoa Basketek Urrezko LEB ligako 32. jardunaldia jokatuko dute bihar, igandea, 18:00etan, Azpeitiko kiroldegian. Maila horretan lehian ari diren Gipuzkoako bi taldeen arteko derbia izango da biharkoa; etxeko taldearentzako mailari eusteko "hil ala bizikoa", saskibaloi klubak adierazi duenez.

Acunsak, berriz, biharkoa galduko balu, aukera gutxi izango lituzke Play Offak jokatzeko. Derbia izateaz gainera, etxeko harrobiko jokalariak izango ditu talde aurkarian Iraurgik; izan ere, Aitor Zubizarreta azpeitiarrak eta Xabier Oroz azkoitiarrak jokatzen dute Acunsa Gipuzkoan.

Juaristi ISBrentzako partida garrantzitsua denez, zaletuen babesa ezinbestekoa dutela adierazi du Iraurgi SBk. Horregatik, bihar arratsaldean kiroldegira joatera animatu dituzte zaleak. Partidarako sarrerak Internetez honako helbide honetan eros daitezke.

Otsailean Acunsaren kontra Donostian jokatutako norgehiagokan 80-70 galdu zuen Juaristi ISBk.

Biharko partidaren atsedenean, nesken Infantil mailako Marmoles Aztiria ISB taldekoek saskibaloi federazioaren txapeldunen saria jasoko dute.

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide