Koronabirusa Azpeitian

Ostalaritza guneak 01:00etan ixtearen alde agertu da EAEko Auzitegi Nagusia

Azpeitiko plaza.

Eusko Jaurlaritzak ordutegia murrizteko erabakia epaitegietara eraman zuten ostalaritza sektoreko eragileek, baina gaur bertan jakinarazi du EAEko Auzitegi Nagusiak ez duela haien eskaera aintzat hartu. Horrenbestez, tabernak eta jatetxeak 01:00etarako itxi beharko dituzte.

Ostalaritza guneak 01:00etarako ixteko agindua indarrean da herenegundik, eta halaxe jarraitu beharko dute urtarrilaren 28ra bitartean. Izan ere, Eusko Jaurlaritzak ordutegia murrizteko erabakia epaitegietara eraman zuten ostalaritza sektoreko eragileek, baina gaur bertan jakinarazi du EAEko Auzitegi Nagusiak ez duela haien eskaera aintzat hartu.

Horrenbestez, tabernak eta jatetxeak 01:00etarako itxi beharko dituzte, Eusko Jaurlaritzak neurri hori hartu baitu COVID-19a izaten ari den bilakaera eteteko. Gainerako neurriak ere indarrean izango dira, hala nola barran ezingo da kontsumitu eta ostalaritza guneen barrualdeko edukierak gehienez %60koa izan beharko du. Halaber, mahai bakoitzeko gehienez hamar lagun elkartu ahal izango dira.

Eusko Jaurlaritzak ostalaritza sektoreak aurkeztutako errekurtsoaren kontrako alegazioak aurkeztu ditu gaur goizean bertan, eta Auzitegi Nagusiko epaileek ontzat jo dituzte horiek. Beraz, auzitegiak erabaki du asteazkenetik indarrean diren neurriak ez direla urgentziaz bertan behera utzi behar.

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide