Azaroaren 17an aurkeztu zuten 22. Korrika, 2022ko martxoan Amurrion (Araba) hasi eta apirilaren 10ean Donostian bukatuko den euskararen aldeko egitasmoa. AEK-k antolatutako lasterketak Euskal Herria zeharkatuko du 11 egunez, eta hura prestatzeko eta sustengatzeko lanean dabiltza antolatzaileak, Korrika berriari "bultzada emateko".
Besteak beste, herriz herri dabiltza AEK-koak, 22. ediziorako atera dituzten arropak eta osagarriak salduz. Azpeitian bihar jarriko dute Korrikaren materiala saltzeko postua. Azoka Plazaren atarian egongo da, 18:30etik 20:30era. Dena den, 22. Korrikaren materiala online ere salgai dagoela gogoratu du AEK-k, korrika.eus webgunean.