Euskararen Nazioarteko Eguna da gaur, eta atzoko udalbatzarrean aho batez onartu zuen Azpeitiko Udalak gaurko egunaren harira Hakoban adostutako adierazpena. Euskal erakundeen koordinaziorako batzordea da Hakoba, eta Eusko Jaurlaritzak, hiru aldundiek, EUDEL udalen elkarteak eta Uemak parte hartzen dute bertan.
Adierazpena bozkatu aurretik, horrelakoak "hainbat sentsibilitateren artean adostea pozgarria" dela adierazi zuen Eneritz Albizu udaleko Euskara batzordeburuak. "Horrek esan nahi du hizkuntza normalkuntzaren erantzule eta eragile garela guztiok. Dena den, adierazpenetatik ekintzetara jotzea beharrezkoa da", esan zuen Albizuk, eta Azpeitiko Udalak euskara sustatzeko eskaintzen dituen zerbitzuak eta martxan dituen egitasmoak aipatu zituen: helduak euskalduntzeko doakotasuna eta metodologia berriak, gaztetxoen Etorkizun programa, lan munduan euskara sustatzeko Elegune enpresentzako zerbitzua, udal barruko Eragin Linguistikoaren Ebaluazioaren mahaia, edota Uemarekin elkarlanean egindakoak aipatu zituen, besteak beste.
Egindakoak eta egiten direnak ahaztu gabe, euskararen arloan "egiteko asko" dagoela ere nabarmendu nahi izan zuen Albizuk: "Herritarren kezkak jaso ditugu eta geure egiten ditugu. Erronka potoloak ditugu: euskararen erabilera gaztetxoen artean, ikus-entzunezko eta teknologia berrien erabilera, erreferenteak, bizilagun berrien integrazioa...". Datorren urtean "euskararen egoeraren diagnostiko oso bat" egiteko asmoa dutela aurreratu zuen atzo batzordeburuak, eta hori ere jaso dutela 2022ko aurrekontuan.
Adierazpena
Hau da, osorik, Hakoban adostu eta atzo Azpeitiko Udalean aho batez onartu zuten Euskararen Nazioarteko Eguneko adierazpena:
"Euskara lanabes, aro berrirantz erabilera-eremu berri eta ez formaletan ere, euskarak arnas berri. Tentuz, baina ateratzen ari gara, azkenean, beltzenetik argira. Berreskuratzen hasi gara gutariko bakoitzaren eta elkarrekin osatzen dugun herriaren eta gizartearen bizitza erakargarri ez ezik, jasangarri ere egiten duena: zuzeneko harremanak; elkartzeko ohiturak, aukerak eta guneak; osatzen gaituzten besteengana biltzeko joera. Eta, horrekin batera, ezinbestekoa dugun jarduera ekonomikoaren hari eta sareak berriz ere indartzen ari gara, pandemiaren aurretiko tokira eta, inola ere ahal balitz, hobera iristeko itxaropenez.
Eta erabaki sendo bat dugu gidari: ez dadila funtsezkorik ezer atzean geratu. Ezta euskara ere. lnola ere ez. Gurekin batera egin dio euskarak pandemiari aurre, eta gurekin irten behar du garaile. lzan ere, aro berrian, gure eta geure gizartearen zaurgarritasunaren jakitun egin gaituen egoera larriaren ondoren, harreman eta komunikazio molde, ohitura eta bide berriak sortzen ari dira, eta are berriagoak eta harrigarriagoak sortuko dira aurrerantzean.
Pandemiak agerian utzi du jakin bagenekiena: zenbateraino diren ezinbestekoak komunikazio ildo eta sareak, zenbaterainoko balioa eransten dion komunikazioak gure zeinahi jarduerari; orain, jakiteaz gain, sentitu ere egiten dugu errealitate hori: sakon-sakoneraino barneratu dugu komunikazioaren, harremanaren funtsezkotasuna. Hori da aro berriaren ezaugarri nagusietariko bat. Eta hori bera du euskarak erronka: komunikazio eta jarduera eremu berrietan ere, naturaltasun osoz, dagokion tokia hartzea. Eraginkorki. Tinko.
Euskara, euskal hiztunon komunitatearen jarrera proaktiboari esker, lKTek hizkuntza gutxituen hedapena eta indartzerako ekarri duten erronka handiari aurre egiten ari zaio, komunikazio eta informazioaren teknologien sareetan. Badu tokirik. Baliagarria da. Eta zinez zaila du hizkuntza ozeano erraldoian horrelakorik lortzea.
Eredugarria da alor horretan ere euskal hiztun komunitateak egin duen eta egiten ari den lana, besteak beste erabilerarekin zuzen-zuzenean loturiko presentzia delako euskarari benetako balÍo erantsia dakarkiona. Eta argi geratzen ari da erakunde publikook eskaini behar dugun ezinbesteko babes eta lidergotik, ekimen eta lankidetza publiko-pribatuaren eskutik lan egiten badugu, erronkaren neurriak ez gaituela beldurtu behar. Gai garela argiro erakusten ari garelako, adibidez hezkuntzaren munduan, hedabideenean, osasungintzarenean, eremu sozioekonomikoan, administrazioarenean eta beste hainbat eta hainbatetan urrats ausartak eman behar direla eta ematen ari garela euskal hiztunen eskubideen gauzapen errealean.
Eta horietan guztietan aurrera egin beharra dago, jakina, aurrerapauso sendoagoak emanez, jarraikortasunez, etengabeko berrikuntzaren bidetik eta guztion konpromisotik. Baina pandemiaren osteko aro berriaren hasiera honek beste ikuspegi bat eranstea eskatzen digu: hizkuntzaren erabilera formalekin batera, eremu ez formaletakoa landu beharra dago, behar besteko lehentasunez.
Euskal hiztunak naturaltasun osoz gauzatu behar du euskaraz bizitzeko aukera, eguneroko harremanetan eremu formaletik lan mundu, aisialdi, kultur edo kirol eremuetara igarotzean, hori bera baita, hain zuzen ere, euskaraz bizitzearen esanahietako bat. Ezin dizkiogulako euskarari ukatu gorputz eta espirituaren atseden eta gozamenari lotzen zaizkion eremu horiek. Eta hor aurrera egiteko, hiztunen konpromisoa ez ezik ezinbestekoa izango da instituziook egin behar dugun ahalegina: bitartekoak jarriz eta eredugarritasuna erakutsiz. Euskararen bizi-indarra dugu jokoan, eremu formalez gainera, eremu ez formal horiek euskararentzat irabaztearen erronkan. lzan ere, alor horretan euskararen erabilerak jauzi bat egiteak errotik eta norabide zeharo positiboan aldatuko luke hiztun asko eta askorengan, oso bereziki gazteengan, euskararekiko bizipena.
Aisialdi eta kirolaren eremuek badituzte, bestalde, berezko ezaugarri baliotsuak hizkuntza erabiltzeko ohituren aldaketari dagokienez, eta askotariko antolakuntzarako joera dute (klubak, federazioak, elkarteak, taldeak...). Nekez bilatuko genuke esparru egokiagorik gazteengana iristeko, euskararen erabilera ez formalari berebiziko bulkada emateko, partaide gazte zein ez hain gazteengan euskararantz urrats eraginkorra egiteko gogoa aktibatuz. Horra, beraz, eginkizuna. Aukera paregabea dugu normaltasun berri baterako bidearen hastapen honetan berreskuratzen ari garen eta asmatuko ditugun harreman eta erabilera-eremu berrietarako euskara, bidelagun ez ezik, lanabes eraginkor bilakatzeko. Guztion esku dago.
Euskara prest dugu; gure gizartea, gogotsu; gure herria, erabakia hartuta. Abia gaitezen".