Zilarrezko eta brontzezko domina banarekin itzuli da Jonathan Terron Espainiako Jiu-jitsu Txapelketatik

Joan zen asteburuan jokatu zuten Espainiako Jiu-jitsu Txapelketa Madrilen. Terronek  nahi baino emaitza apalagoak eskuratu zituen, ihes egin baitzion Ne-Wanza modalitateko aurreneko postuak. Modalitateko horretan azpitxapeldun sailkatu zen, eta brontzezko domina eskuratu zuen borroka modalitatean. Urrezko domina eskuratu ez izanaren arantzarekin baina bi dominarekin itzuli da Espainiako txapelketatik.

Jonathan Terron Azpeitiko bizilagun eta jiu-jitsularia zilarrezko eta brontzezko domina banarekin itzuli da  Espainiako Jiu-jitsu Txapelketatik. Joan zen asteburuan jokatu zuten txapelketa Parlan (Madril), eta Terron Ne-Wanza modalitatean eta borroka modalitatean aritu zen lehian.

Terronen helburua zen Ne-Wanza modalitateko 85 kilo azpikoen mailan txapeldun izatea, baina azken unean ihes egin zion lehen postuak Azpeitiko bizilagunari, eta Espainiako azpitxapeldun sailkatu zen modalitate horretan. Terronek azaldu duenez, puntuaketan berdin zihoazen aurkaria eta bera, baina epaileak hartutako erabaki batek aurkariari eman zion abantaila. Ne-Wanza modalitatean zilarrezko domina eskuratzeaz gain, brontzezko domina eskuratu zuen borroken modalitatean.

Azpeitiko Condor klubeko jiu-jitsulariak azaldu duenez, txapelketa ez irabazi izanak "arantzatxoa" utzi dio, baina egindako lanarekin "gustura" dagoela esan du. Orain, txapelketak utzi, eta denbora batez atseden hartuko duela kontatu du, nahiz eta datorren urtean sariketetara aurkezteko asmorik ez zaion falta. Hain zuzen, hori da Terronen asmoa: atseden hartzea eta hurrengo urtera begira prestatzen jarraitzea. 

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide