Cecilio Arabaolaza hil da, danborrada Azpeitira ekarri zuenetako bat

Cecilio Arabaolaza Donostiako Sarriegi plazan, 2011n. (Irati Sarasua, Argia)

Baltasar Iglesias apaizkidearekin batera antolatu zuen Arabaolazak umeen lehen danborrada, 1957an. 2007an, 50. urteurrenean, danborradaren eta udalaren omenaldia jaso zuen.

Cecilio Arabaolaza, Azpeitiko danborradaren sortzaileetako bat, atzo hil zen, 94 urterekin. Donostiarra zen Arabaolaza, eta Baltasar Iglesias apaizkide eta herrikidearekin batera, Azpeitiko kaleetan egin zen aurreneko danborradaren sustatzailea izan zen.

Azpeitiko Parrokian egiten zuten lan bi apaizek, bereziki gazteekin, Oargi erakundean. Donostiarrak eta danborradazaleak, Azpeitian parrokiako zaindari Soreasuko Sebastianen omenez urtarrilaren 20a jaieguna izaten zela baliatuta, Oargiko gazteekin danborrada antolatzea otu zitzaien Arabaolazari eta Iglesiasi. Pentsatu, antolatu eta egin: 1957ko urtarrilaren 19an, San Sebastian bezperako iluntzean, ibili ziren Oargikoak eta bi apaizak kalez kale Sarriegiren doinuak danbor hotsez joaz, Bandak lagunduta.

Arabaolazaren eta Iglesiasen ekimenak arrakasta berehalakoa izan zuen. 1959an hasi ziren helduen danborrada ere egiten, eta urteen poderioz hazten eta indartzen joan zen sansebastianetako danborrada. 2007an, lehen danborrada hura irten zen 50. urteurrenean, umeen danborradaren eta Azpeitiko Udalaren omenaldia jaso zuen Arabaolazak udaletxean.

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide