Jon Etxaniz: "Eskerrak etxekoei, haiek gabe ezingo nukeen honaino iritsi"

(Argazkia: Arnaitz Rubio Aprea)

Kontxako Bandera irabazi du Jon Etxanizek (Azpeitia, 1994), Santurtzirekin. Igandeko saioan lehia estua izan zen arren, Hondarribiari aurre hartzea lortu zuen taldeak. "Oso gustura" dago arraunlaria.

Kontxako Bandera irabazi berritan, zer moduz zaude?

Ondo, oso gustura. Oraindik ez dakit konturatu naizen zer lortu dudan. Egia esan, kostatzen da sinestea.

Ospatu al duzu garaipena?

Bai, beno. Ezer apartekorik ez genuen egin igandean. Santurtzira joan ginen, zerbait bazkaldu eta pare bat trago hartu genituen. Parranderoak ez gara, eta...

Arraunlaria izanda, ez dago parranda asko egiterik, ezta?

Ez, ez. Gainera, Santurtzi urruti dago, eta gero etxera bueltatu behar...

Lehia estua izan zen igandeko estropadan Hondarribiaren eta Santurtziren artean, eta azkenean, justu-justu irabazi zenuten. Zer balorazio egiten duzu?

Estropada gogorra izan zen. Beti atzetik ikusten genuen geure burua, eta pentsatzen genuen ihes egingo zigula banderak. "Aurten ere ez dut irabaziko", pentsatzen nuen [iaz Oriorekin jokatu zuen Kontxako bandera, eta Hondarribiak irabazi zuen]. Eta azkenean, ba begira.

Une batean galdutzat eman al zenuten estropada?

Beno, galduta galduta ez dakit... Baina nahiko zaila ikusten genuen irabaztea. Irla parean gindoazela, besteen txalupa pixka bat aurretik ikusten zen, eta, gainera, aurreko asteko abantaila zuten.

Tentsio uneak biziko zenituzten, beraz, traineruan.

Ez dakit momentuan tentsioa egoten den. Pentsatzeko denbora asko ere ez dugu izaten, egia esan. Geure lanarekin segi behar izaten dugu.

Eta zailtasunak zailtasun, helmugara iritsi eta bandera zuek irabazi zenutela jakitea...

Ederra izan zen, amestutako momentua.

Kontxa irabazita, ligan aurreneko postuan amaitzea izango da zuen hurrengo helburua. Asteburuan amaituko duzue aurtengo denboraldia.

Bai, sei puntuko abantaila dugu, eta gauzak asko okertu beharko lirateke guk liga ez irabazteko. Oraindik edozer pasa daiteke, baina nahiko bideratuta dugu kontua.

Kontxaz gain, liga irabazten baldin baduzue, a zer denboraldia...

Bai, bai. Biak irabaztea sekulakoa izango litzateke.

15 urterekin Zumaian arraunean hasi zinenean ez zenuen inondik inora esperoko gaur zauden lekura iristea.

Bai zera. Amestu bai, baina horrelakoak ametsetan bakarrik izaten zirela uste nuen. Halako ametsak betetzeko zortea behar da eta dena ondo tokatu behar zaizu.

Jarraitu elkarrizketa irakurtzen Urola Kostako Hitzaren webgunean.

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide