Koronabirusa Azpeitian

Azken hiru egunetan sei kasu positibo zenbatu ditu Osasun Sailak herrian

Intzidentzia tasak ez du gorabeherarik izan azken egunetan. Araban, Bizkaian eta Gipuzkoan intzidentzia tasak beste zortzi puntu egin du behera, eta 172,34an kokatu da.

Azken hiru egunetan egindako PCR eta antigeno proben emaitzak jakinarazi ditu Eusko Jaurlaritzako Osasun Sailak, eta txostenaren arabera, Azpeitian sei positibo zenbatu dituzte azken hiru egunetan –bi ostiralean eta lau atzo, igandea–. Azken hamalau egunetako 100.000 biztanleko intzidentzia tasak, ordea, ez du ez gorabeherarik jasan. 203,68an zegoen zenbatekoa joan den osteguneko datuak kontuan hartuta, eta gaur ere berdin mantendu da.

Urola Kosta eskualdean, berriz, 22 kasu positibo baieztatu dituzte. Aurreko asteburuan hamabost kasu izan ziren; zazpi gutxiago. Azken hiru egunetan sei lagunek eman dute positibo Azpeitian –bik ostiralean eta lauk larunbatean–, bostek Aian –hiruk ostiralean eta bik larunbatean–, eta launa zenbatu dituzte Zarautzen –batek ostiralean eta hiruk atzo– Azkoitian –bina ostiralean eta atzo–. Orion, Zestoan eta Zumaian, berriz, kasu bana atzeman dute asteburuan; larunbatean Orioren eta Zestoaren kasuan, eta ostiralean Zumaian.

Gaur egun Aia da, eskualdeko udalerrien artean, intzidentzia tasarik altuena duena: 251,89an dago asteburuko emaitzen ostean. 5.000 biztanletik gorako herrien artean, ordea, Azkoitiak du tasarik altuena, 225,32koa. Hala ere, zenbatekoak behera egin du ostiraletik Azkoitian, 242,01an baitzegoen osteguneko datuak kontuan hartuta. 200eko langatik behera dago Zumaia, 172,99ko intzidentzia tasarekin —jaitsi egin da ostiraletik, 193,34an baitzegoen egun horretan—, eta Zestoa da eskualdean tasarik altuena duen bosgarren udalerria; 179,76koa —berdin mantendu da ostiraletik—.

Orion, aldiz, 81,54tik 97,85ra igo da tasa ostiraletik, eta Zarautzen, berriz, 94,23an jarraitzen du. Getarian beheranzko joerari eusten dio tasak, eta 35,34an dago gaur egun. Beizaman hutsean dago oraindik, baina berrikuntza moduan, Aizarnazabalen eta Errezilen ere hutsean jarri da tasa asteburua eta gero.

Positiboak, gutxitzen

Atzo, igandean, 158 kasu positibo detektatu zituzten Hego Euskal Herrian –240 izan ziren aurreko igandean, irailaren 5ean–; hain justu, 61 Bizkaian, 40 Gipuzkoan, 39 Nafarroan, hamazazpi Araban eta bat lau lurralde horietatik kanpo bizi diren pertsonen artean. Proba egindakoen %3,2k eman zuten positibo atzo Araban, Bizkaian eta Gipuzkoan, eta beraz, positibotasun tasak nabarmen egin du behera: %5,1ekoa izan zen osteguneko probetan. Nafarroan, baina, igo egin da positibotasun tasa: %3,7koa izan zen ostegunean, eta %5ekoa atzo.

Atzoko datuen arabera, Osakidetzaren ardurapeko erietxeetan, COVID-19ak jotako 170 lagun daude ospitaleratuta; 57 dira ZIUn daudenak. Ostiralean 29 ospitaleratze berri izan ziren Osakidetzan, hemeretzi larunbatean eta 26 atzo. Nafarroan, berriz, lau lagun ospitaleratu dituzte, eta gaur-gaurkoz 65 dira erietxean dauden gaixoak; ZIUn larri dauden herritarrak, berriz, hogei dira. Araban, Bizkaian eta Gipuzkoan intzidentzia tasak beste zortzi puntu egin du behera, eta 172,34an kokatu da. 

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide