Jon Etxanizek Kontxako bandera irabazi du Santurtzirekin

Jon Etxaniz arraunlari azpeitiarrak Kontxako bandera irabazi du gaur, Santurtziko Sotera ontziarekin. Estropada bukatu ostean gustura agertu da arraunlaria; etxekoak ere Donostian izan ditu animatzen.

15 urterekin hasi zen Jon Etxaniz (Azpeitia, 1994) arraunean, Zumaian. Zortzi urte egin zituen Telmo Deunen, eta 2018ko denboraldiko etenaren ostean, berriro arraunari heldu zion, Orion hasi zen. Aurtengo sasoian hasi da Bizkaiako Santurtzi taldearekin. Denboraldi bikaina egin du Sotera traineruak, eta gaur eguerdian gizonezkoetan Kontxako bandera irabazi dute, Hondarribiaren aurretik eginda.

Santurtziko arraunlariak Kontxako banderarekin; tartean, Jon Etxaniz azpeitiarra. (Argazkia: Arnaitz Rubio Aprea)

Kontxako estropadetako bigarren jardunaldia jokatu da gaur, eta bandera irabazteko bi segundoren aldea besterik ez zegoen Hondarribia eta Santurtziren artean. Estropadan bi traineruen arteko lehia ikaragarria izan da, eta azkenean, Etxanizek arraun egiten duen taldea izan da garailea.

Sailkapena (bi jardunaldietako denborak batuta)

1. Santurtzi: 38:19.09

2. Hondarribia:  38:19.57

3. Zierbena: 38:31.41

4. Donostiarra: 38.31.96

5. Orio: 38:42.39

6. Urdaibai: 38:50.36

7. Cabo da Cruz:  39:06.14

8. Ares: 39:46.14

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide