Etxekalte eta Habi taldeen kontzertuak izango dira zapatuan Sanagustinen

Etxekalte taldeko lau kideak. (Utzitakoa)

Arkupehotsak egitasmoaren laugarren edizioaren barruan eskainiko dituzte bi kontzertu horiek, eta dagoeneko eskura daitezke emanaldirako doako gonbidapenak, Kulturazen webgunean. 19:00etan hasiko dira kontzertuak.

Iraila indartsu hasteko bi kontzertu izango dira zapatuan, irailak 4, Sanagustin kulturgunean. Arkupehotsak egitasmoaren laugarren edizioaren barruan, Habi eta Etxekalte taldeak igoko dira kulturguneko agertokira, 19:00etan hasita, eta dagoeneko eskura daitezke emanaldirako doako gonbidapenak, Kulturazen webgunean.

Etxekalte taldea rock alternatiboa egiten duen Bermeoko (Bizkaia) taldea da, eta Unai Irisarrik, Jon Andoni Juarezek, Iker Etxebarriak eta Iñaki Olondok osatzen dute. 2019. urtean Gure hizkeran deituriko lana kaleratu zuten. Habi, berriz, Villabonako (Gipuzkoa) taldea da, eta rock estiloko abestiak egiten dituzte horiek. 2018. urtean sortu zuten Jon Ander Artolak eta Yeray Gasconek, eta ordutik, bi disko plazaratu dituzte; Koloreak deitzen da beren azken lana.

Hona hemen Etxekalte eta Habi taldeek batera ondutako Arimak abestia:

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide