Osasun Sailak kaleratutako txostenaren arabera, Azpeitian lau koronabirus kasu zenbatu dituzte azken orduetan. Datu hori tarteko, zertxobait behera egin du intzidentzia tasak: izan ere, atzo 834,43 zen tasa, eta gaur, berriz, 821,28. Oraingoz, eremu gorrian jarraitzen du Azpeitiak, azken hamalau egunetan herritar ugarik eman baitute positibo.
Urola Kostako herrietan egindako PCR eta antigeno probetan, berriz, 22 koronabirus kasu hauteman dituzte azken orduetan. Duela astebete zenbatutakoak baino sei kasu gehiago dira –hamasei izan ziren joan den asteartean– atzo, astelehena, hauteman zituztenak. Edonola ere, egoera hobera egiten ari da apurka-apurka, eta atzoko datuekin alderatuta, Orio da intzidentzia tasak gora egin duen Urola Kostako herri bakarra.
5.000 biztanletik gorako herrien artean, eremu gorrian jarraitzen dute Azpeitiak, Zarautzek eta Zumaiak. Azken orduetan, Zarautzen zenbatu dute kasu kopuru altuena: zortzi. Azkoitian gisan, Getarian ere bi kasu detektatu dituzte, Zestoan eta Azpeitian launa, eta Orion eta Zumaian bana. Gainerako herrietan, berriz, ez dute kasu berririk zenbatu.
Hego Euskal Herrian 792 kasu
Eusko Jaurlaritzak eta Nafarroako Gobernuak emandako datuen arabera, atzo 8.404 proba egin zituzten lau lurraldeetan, eta horietan 792 lagunek eman zuten emaitza positiboa. Bizkaian zenbatu zuten kasurik gehien: 330. Gipuzkoan 186 izan ziren, Nafarroan 151, eta Araban, aldiz, 104. Datu horien arabera, positibotasun tasa %10eko langatik jaitsi da. Araban, Bizkaian eta Gipuzkoan % 9,4koa da adierazle hori, eta Nafarroan, %9koa.
Ospitaleetako egoerak, ostera, okerrera egin du. Osakidetzaren mendeko erietxeetan 283 pertsona daude ospitaleratuta, igandean baino hamahiru gehiago. Horietatik 73 dira ZIUetan daudenak. Nafarroan, berriz, hamasei pertsona ospitaleratu zituzten atzo izurriak jota. Guztira, 103 pertsona daude hango ospitaleetan, horietatik 25 Zaintza Intentsiboen Unitateetan.