Koronabirusa Azpeitian

1.041 kasu zenbatu dituzte Hego Euskal Herrian

Uztailaren 2an egindako probetan 650 positibo zenbatu zituzten lau lurraldeetan; azken orduetan, ordea, 1.041 kasu izan dira, duela astebete baino ia 400 gehigao. Positibotasun tasak ere gora egin du, eta apirileko kopuruetara itzuli da Hego Euskal Herria.

Azken bi asteetan igo egin da Hego Euskal Herrian atzemandako kasu berrien kopurua, eta apirileko kopuruetara iritsi da. Atzo, uztailaren 9an, koronabirusa atzemateko 11.926 proba egin zituzten Araban, Bizkaian, Gipuzkoan eta Nafarroan, eta 1.041 lagunek eman dute positibo guztira. Duela astebete 650 kasuren berri eman zuten Eusko Jaurlaritzak eta Nafarroako Gobernuak; orain dela bi aste, aldiz, 243 kasu baieztatu zituzten.

Bizkaian atzeman dituzte kasu gehien azken orduetan; hain zuzen, 352. Nafarroan zenbatutako kasuak 304 izan dira, 263 positibo zenbatu dituzte Gipuzkoan, 91 Araban eta 31 lau lurralde horietatik kanpo.

Araban, Bizkaian eta Gipuzkoan 9.384 proba egin zituzten atzo. Horietatik 737 izan ziren emaitza positibodunak; hau da, %7,9. Positibotasun tasak, beraz, gora egin du azken astean, duela astebete %5,9 izan baitziren positiboak. Nafarroan ere igo egin da positibotasun tasa astebetean, %10,5etik %13,3ra.

Osakidetzaren ardurapean dauden erietxeetan 23 pertsona ospitaleratu zituzten atzo, bezperan baino lau gutxiago. Zainketa Intentsiboko Unitateetan dauden lagunen kopurua, dena den, berdin mantendu da: 28 ziren atzo, eta 28 dira gaur-gaurkoz ere.

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide