Arreta soziosanitarioari buruzko ikastaroa egin nahi duten herritarrekin bildu dira udal ordezkariak

Aste honetan egin duten bilerako irudia. (Azpeitiko Udala)

Formazioaren inguruko informazioa eskaintzeko eta oinarrizko froga egiteko gauzatu dute bilkura aste honetan. Ikastaroko plazak mugatuak dira, eta 60 lagunek izena eman dutenez, oinarrizko froga hori hartuko dute kontuan taldea osatzeko. Udalak azaldu duenez, datorren ikasturtea bukatzerako beste ikastaro bat eskainiko du.

Irailetik aurrera, arreta soziosanitarioari buruzko ikastaroa eskainiko du Azpeitiko Udalak, eta ikastaroan parte hartu nahi duten herritarrekin bildu dira erakundeko ordezkariak aste honetan, haiei formazioaren inguruko informazioa eskaintzeko eta oinarrizko froga egiteko.

Udalak azaldu duenez, ikastaroko plazak mugatuak dira, eta horregatik, eskualdeko biztanleek soilik izan dute aurten izena emateko aukera. Gainera, oinarrizko froga aintzat hartuta osatuko dute ikastarorako taldea; izan ere, aurten 60 lagunek eman dute izena.

Ez da udalak ikastaroa eskainiko duen lehen aldia; izan ere, arreta soziosanitario titulua lortu dute hainbat lagunek azken urteetan Azpeitian. Gainera, erakundeak azaldu duenez, datorren ikasturtea amaitzerako hurrengo ikastaroa hastea aurreikusten du.

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide