Koronabirusa Azpeitian

360 positibo berri zenbatu dituzte Hego Euskal Herrian

Kasurik gehien Bizkaian atzeman dituzte (170), eta ondoren, Gipuzkoan (86), Nafarroan (73) eta Araban (31). Positibotasun tasa nabarmen jaitsi da Araban, Bizkaian eta Gipuzkoan, eta igo egin da Nafarroan.

Eusko Jaurlaritzak eta Nafarroako Gobernuak argitaratu dituzte atzo, ostirala, egindako PCR eta antigeno proben emaitzak. Guztira, 9.881 proba egin zituzten atzo lau lurraldeetan, eta horietatik 360k eman zuten positibo. Lurraldez lurralde, Bizkaian atzeman zituzten kasurik gehien (170), eta ondoren, Gipuzkoan (86), Nafarroan (73) eta Araban (31).

Positibotasun tasari dagokionez, atzotik nabarmen jaitsi da Araban, Bizkaian eta Gipuzkoan, %4,1etik %3,5era, hain zuzen. Nafarroan, aldiz, igo egin da tasa, %3,1etik %4,1era.

Bestalde, atzo 28 pertsona ospitaleratu zituzten Araban, Bizkaian eta Gipuzkoan, eta uneotan 83 dira ZIUetan dauden eriak. Osasunbideak, berriz, ez du ospitaleratzeen inguruko informaziorik eman.

Etzi, astelehena, jakinaraziko ditu Eusko Jaurlaritzak herriz herriko datuak.

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide