'Erradikalak ginen' ikuskizuna izango da zapatuan Soreasu antzokian

Beatriz Egizabal eta Ane Labaka, 'Erradikalak ginen' antzezlaneko une batean. (Cesar Marcos)

19:00etan hasiko da saioa, eta dagoeneko eros daitezke sarrerak Kulturazen webgunean, hamasei euroren truke. Ane Labaka bertsolariak eta Beatriz Egizabal aktoreak ondu dute ikuskizuna.

Erradikalak ginen ikuskizuna eskainiko dute zapatuan, hilak 5, Ane Labaka bertsolariak eta Beatriz Egizabal aktoreak. 70 minutu irauten dituen antzezlanak, eta hainbat gai lantzen dituzte bertan, hala nola sexualitatea, merkatu patriarkala eta intersekzionalitatea. Euskal Herriko Bilgune Feministaren sostengu ekonomikoa bultzatzeko kultur ekimena da Erradikalak ginen, eta dagoeneko eros daitezke saiorako txartelak Kulturazen webgunean, hamasei euroren trukean.

Honako hau da antzezlanaren sinopsia: "Erradikalak ginen, gara eta izango gara. Bigarren aldiak inoiz onak izan ohi ez direla diotenei aurka egitera gatoz. Lehen aldi hartako pasioz, korseak askatuta, bertso eta bakarrizketa bidezko formatuari eutsi eta buruberokiak eduki berriz betetzeko gogoz. "Neska gazte promesa" etiketaz, zahartzeaz, gorputzaren aldaketez, sexualitateaz, merkatu patriarkalaz, intersekzionalitateaz, beldurraz, biolentziaz eta zeharkatzen gaituzten beste hainbat gaiz kantatu eta kontatu nahi dugu. Feminismoa zeharlerrotzat hartuta eta umorez. Umorez, beraz, serio".

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide