Koronabirusa Azpeitian

Hiru kasu berri hauteman dituzte Azpeitian, eta zertxobait igo da intzidentzia tasa

Eremu laranjan jarraitzen du Azpeitiak, eta 5.000 biztanletik gorako eskualdeko herrietatik bigarren tasarik altuena du: 308,80. Hego Euskal Herrian, bestalde, egoerak hobera egiten jarraitzen du; %3,2 da positibotasun tasa Araba, Bizkai eta Gipuzkoan, eta %2,7 Nafarroan.

Eusko Jaurlaritzaren Osasun Sailak argitaratu ditu atzo, astelehena, egindako PCR eta antigeno proben emaitzak, eta apurka-apurka bada ere hobetzen ari da eskualdeko egoera. Azpeitiak eremu laranjan jarraitzen du; hiru positibo hauteman zituzten atzo, eta intzidentzia tasa 302,32tik 308,80ra igo da. Zarautzen ere hiru positibo zenbatu zituzten atzo, baina intzidentzia tasak bere horretan jarraitzen du; hain zuzen ere, 214,16koa da tasa herri horretako tasa.

Une honetan Azkoitia da eremu gorrian dagoen eskualdeko herri bakarra, eta Urola Kostan zenbatutako hamabi kasuetatik bost bertan zenbatu zituzten. Hori dela eta, zertxobait gora egin du 100.000 biztanleko azken hamalau egunetako tasak; 517,40koa da uneotan, Gipuzkoako herri handien tasetatik altuena.

Horrez gain, hainbat egun positiborik gabe igaro ostean, kasu bat hauteman zuten atzo Orion. Hala eta guztiz, eremu berdean jarraitzen dute han 32,62ko intzidentzia tasarekin. Gainontzeko herrietan, berriz, ez zuten positibo berririk zenbatu atzo, eta herri horietako tasek apaltzera egin dute. Aian 50,38 da tasa, Aizarnazabalen eta Beizaman hutsa, Errezilen 966,18, Getarian 70,67, Zestoan 256,81 eta Zumaian 172,99.

Positibotasun tasa, behera

Hego Euskal Herrian ere egoerak hobera egiten jarraitzen du, baina kutsatzeen kurba mantso ari da jaisten. Guztira, 10.684 PCR eta antigeno proba egin zituzten lau lurraldeetan, eta horietatik 329 izan ziren positiboak. Lurraldez lurralde, Bizkaian atzeman zituzten kasu gehien (160), eta ondoren, Gipuzkoan (91), Nafarroan (53) eta Araban (19). Horrez gain, Araba, Bizkai eta Gipuzkoatik kanpoko herritarren sei positibo zenbatu zituen Osakidetzak.

Ospitaleetako egoerak ere hobera egiten jarraitzen du. Araban, Bizkaian eta Gipuzkoan 212 dira COVID-19agatik ospitaleratuta dauden eriak, eta 117 pertsona daude ZIUetan. Nafarroako erietxeetan, berriz, 64 pertsona daude —ez dute zehaztu ZIUetako erien kopurua—. Positibotasun tasak ere %5etik beherakoa izaten jarraitzen du; %3,2 da Araban, Bizkaian eta Gipuzkoan, eta %2,7 Nafarroan.

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide