Gipuzkoako Eskolarteko Txapelketaren kanporaketa jokatuko dute ostiralean, Soreasu antzokian

Iazko finalistak, elkarrekin.

Xabier Albizu bertsolari azpeitiarrak Soreasu antzokian jokatuko den kanporaketan parte hartuko du, ostiralean. Saiorako gonbidapenak Bertsozale elkartearen webgunean eskatu daitezke.

Gipuzkoako Eskolarteko Txapelketa martxan da; apirilaren 23an ekin zioten hogei bertsolarik lehiari. Guztira, lau kanporaketa jokatuko dituzte horiek, eta Azpeitikoa hirugarrena izango da. Ostiralean, 19:00etan, izango da saioa Soreasu antzokian, eta Xabier Albizu bertsolari azpeitiarra izango da bertsolarietako bat. 

Albizurekin batera jokatuko du Azpeitiko kanporaketa Naia Arrizabalaga Erniarraitz bertsozale elkarteko kide azkoitiarrak ere. Beñat Mateosek, Izar Zelarainek, Mikel Etxezarretak eta Aratz Lasak osatuko dute seikotea. Finala, berriz, maiatzaren 28an izango da Urnietako (Gipuzkoa) Saroben.

Azpeitiko saiorako gonbidapenak gaurtik aurrera www.bertsozale.eus webgunean eskatu beharko dira galdetegia beteta. COVID-19a dela eta, eremu gorrian dago Azpeitia, eta, beraz, Azpeitiko bizilagunek soilik hartu ahal izango dituzte saiorako gonbidapenak.

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide