Eusko Jaurlaritzak argitaratu ditu koronabirusaren bilakaera aztertzen duten asteburuko datuak, eta datuak ez dira batere onak. Azpeitian hamazazpi positibo baieztatu dituzte azken hiru egunotan: sei ostiralean, hiru larunbatean eta zortzi atzo. Horrenbestez, nabarmen egin du gora herriko intzidentzia tasak: ostiralean 164,26koa zen eta 262,81ekoa da gaur. Dena dela, joera kezkagarria izan arren, oraindik eremu horian jarraitzen du Azpeitiak.
Eskualdean ere erruz ugaritu da positiboen kopurua, ostiralaz geroztik 136 kasu atzemanda. Zarautzen eta Azkoitian atzeman dituzte gehien, 49na hain zuzen ere. Azkoitian 917,97ko intzidentzia tasa dute eta Zarautzen 621,06koa. Ondorioz, 400dik gorako intzidentzia tasa izanik, aparteko neurri murriztaileak izango dituzte bihartik aurrera, gutxienez datorren asteartera arte. Eremu gorrian dagoen eskualdeko hirugarren herria Orio da. Asteburuan, bederatzi kasu berri atzeman dituzte han eta 505,54koa da intzidentzia tasa.
Zumaia eremu laranjan dago eta 400eko langara gerturatzen ari da; asteburuko zazpi positibo berrirekin, 376,51koa da intzidentzia tasa. Getarian, berriz, lau positibo baieztatu dituzte asteburuan eta 800dik gorako tasa dute. 5.000 biztanletik beherako herria izanik, Jaurlaritzak beste irizpide batzuk hartzen ditu kontuan, eta momentuz ez du sartu herri gorrien zerrendan.
1.000 kasutik gora Hegoaldean
Hego Euskal Herriko datuei dagokienean, Araban, Bizkaian eta Gipuzkoako 26.602 proba egin zituzten ostiraletik eta igandera bitartean, eta horietatik 2.270k eman zuten positibo. Lurraldeka, Bizkaian atzeman zituzten kasu gehien asteburuan (1.076), baina Gipuzkoan ere gora egin du kutsatu kopuruak, hiru egunetan 894 kasu berri baieztatu baitituzte; Araban, berriz, 289 izan dira. Nafarroako Gobernuak ez ditu eman datu eguneratuak, baina, ostiraleko eta larunbateko datuak kontuan hartuta, 515 kasu berri izan dituzte.
Erietxeetan ere gora egin du paziente kopuruak eta datuak ere kezkagarriak dira. Hala, asteburuan 212 lagun ospitaleratu dituzte Araba, Bizkaia eta Gipuzkoako erietxeetaneta atzo 115 lagun zeuden Zainketa Intentsiboen Unitatean. Nafarroan, bestalde, azken egunetan 31 lagun ospitaleratu dituzte (Nafarroak ez ditu eman igandeko datuak) eta horietatik sei ZIUn.
Aparteko neurriak Azkoitian, Orion eta Zarautzen
Gipuzkoak 400dik gorako intzidentzia tasa duenez (483,30), bihartik aurrera itxita egongo da lurraldea. Hori dela eta, gipuzkoarrek ezingo dute lurraldearen mugetatik atera eta kanpokoek ezingo dute lurraldera sartu, ez bada justifikatutako arrazoiren batengatik. Baina lurraldea ez ezik, barruko hainbat udalerri ere itxita egongo dira, 400dik gorako tasa dutelako. Urola Kostan, Azkoitia, Orio eta Zarautz daude egoera horretan, eta herri horietan aparteko neurri murriztaileak izango dituzte indarrean, gutxienez datozen asteartera arte.
- Mugikortasuna. 400dik gorako intzidentzia tasa duten udalerrietako bizilagunek ezingo dute udalerritik irten eta beste udalerrietako bizilagunek ezingo dute horietara sartu, ez bada lan, hezkuntza, osasun edo zaintza arrazoiengatik. Salbuespenik egongo da, ordea: mugakide diren eta ohiko zirkulazioa duten udalerrien artean mugitzea baimenduta egongo da erosketak eta aire zabaleko jarduera fisikoa egiteko, nahiz eta udalerri horietakoren batek edo bi udalerriek 400dik gorako intzidentzia tasa izan.
- Ostalaritza. 400dik gorako intzidentzia tasa duten udalerrietako tabernek eta jatetxeek are mugatuago izango dute lokalen barrualdean zerbitzua emateko ordutegia: 06:30etik 09:30era eta 13:00etatik 16:30era bitartean bakarrik eskaini ahal izango dute zerbitzua. Aire zabaleko terrazetan orain arteko zerbitzu bera eman ahal izango dute: edukiera osoan eta 06:00etatik 20:00etara. Aurrez egindako eskaerak 21:00ak arte entregatu ahal izango dituzte establezimenduan bertan aurrez hitzordua eskatuta, eta etxez etxeko banaketa 22:00ak arte egin ahal izango dute. Orain arte bezala, bezeroek mahai bueltan eserita kontsumitu beharko dute, gehienez lau laguneko taldeetan, eta maskara uneoro jantzita eduki beharko dute, elikagaiak edo edariak hartzen dituzten momentuan izan ezik.
- Kirola. 400dik gorako intzidentzia tasa duten udalerrietan, gehienez lau laguneko taldeetan egin ahalko dira barruko kirol jarduerak, eta gehienez sei laguneko taldeetan kanpokoak. Talde profesionalen eta federatuen entrenamenduei eta lehiaketei ez die eragingo neurri horrek. Udalerri horietako kiroldegietako aldagelak eta dutxak itxi egingo dira, igerilekuetakoak izan ezik; horietan, aldagelak erabili ahal izango dira gehieneko edukieraren %35eko mugarekin, eta dutxak erabili ahal izango dira, baldin eta banakakoak badira.
- Eskola kirola. 400dik gorako intzidentzia tasa duten udalerrietan, barruko instalazioetan gehienez lauko taldeetan aritu beharko dute umeek, eta kanpoan, gehienez seiko taldeetan. Horientzat ere aldagelak eta dutxak itxita egongo dira, igerilekuetakoak izan ezik.