Koronabirusa Azpeitian

%7,9ra jaitsi da positibotasun tasa Hego Euskal Herrian

Herenegun Hego Euskal Herrian izandako kopuruarekin alderatuta, kasu positibo gutxiago atzeman zituzten atzo. Guztira 8.085 PCR eta antigeno test egin zituzten Hego Euskal Herrian, herenegun baino 109 gehiago.

Eusko Jaurlaritzako Osasun Sailak eta Nafarroako Gobernuko Osasunbideak argitara eman dute atzoko probetan hautemandako kasu positiboen kopurua. Hego Euskal Herrian 8.085 PCR eta antigeno test egin zituzten, eta horietatik 645 izan ziren positiboak. Kopuru horrekin, %7,97an kokatzen da positibotasun tasa, herenegun baino puntu bat inguru gutxiago.

Araban, Bizkaian eta Gipuzkoan, 6.508 proba egin zituzten, eta horietatik 491 izan ziren positiboak. Lurraldeka begiratuz gero, Bizkaian zenbatu zituzten kasu gehien; 202 kasu detektatu zituzten han, herenegun baino 11 kasu gutxiago. Gipuzkoan, berriz, 197 kasu zenbatu zituzten –herenegun ere kopuru bera izan zen– eta 87 positibo Araban. Hiru lurraldeetako positibotasun tasa, beraz, %7,5ekoa da gaur gaurkoz. Nafarroan, berriz, 1.577 test egin zituzten, eta 154 positibo atzeman; kutsatze tasa, beraz, %7,6koa da Nafarroan, herenegun baino %0,2 gutxiago.

Ospitaleen egoerari buruzko informazioa ere eman du Osasun Sailak. Zehazki 53 pertsona ospitaleratu zituzten atzo, herenegun baino bost pertsona gehiago. Era berean, gogorarazi du "COVID-19a duten" 95 pertsona daudela uneotan Zainketa Intentsiboen Unitatean.

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide