Koronabirusa Azpeitian

Lau positibo berri atzeman zituzten atzo Azpeitian

Aurreko lau egunetan hiru kasu izan ondoren, intzidentzia tasak zertxobait gora egin du atzokoarekin, 170,83n kokatzeko. Eskualdean agertutako positiboen erdiak zenbatu zituzten atzo Azpeitian, eta Zestoan eta Zumaian hauteman zituzten besteak.

Eusko Jaurlaritzak kaleratu du koronabirusaren bilakaeraren inguruko eguerdiroko txostena, eta horren arabera, atzo zortzi positibo zenbatu zituzten Urola Kostako herrietan: erdiak Azpeitian, hiru Zestoan eta bat Zumaian. Horrenbestez, hiru herri horietako intzidentzia tasek zertxobait gora egin dute. Azpeitiak 170,83koa du, Zestoak 231,12koa, eta Zumaiak 183,17koa. Dena dela, 5.000 biztanletik gorako eskualdeko herri guztiek eremu horian jarraitzen dute gaur-gaurkoz, arrisku maila altua adierazten duen 500eko intzidentzia tasatik urrun, beraz.

Aipatzekoa da, gainera, Zarautzen ez zutela kasu positiborik atzeman atzo. Azken egunotan gorazko joera hartua zuen hango intzidentzia tasak, ostegunetik atzora bitartean hamasei positibo baieztatuta, baina atzoko emaitza onek joera hori hautsi egin dute, eta zertxobait jaitsi egin da hango tasa: 269,84koa da egun. Jaitsierak jaitsiera, eskualdeko tasarik altuena du Zarautzek.

Eskualdeko gainontzeko herrietan ez zuten positiborik hauteman atzo, eta guztiek 200dik beherako intzidentzia tasak dituzte.

Hego Euskal Herrian, 500dik gora

Eusko Jaurlaritzak eta Nafarroako Gobernuak emandako datuen arabera, atzo, orotara, koronabirusa atzemateko 11.878 proba egin zituzten Hego Euskal Herrian, eta horietatik 552k eman zuten positibo; %4,6k. Arabako, Bizkaiko eta Gipuzkoako positibotasun tasa %4,5ekoa da eta Nafarroakoa %5,2koa. 

Lurraldeka, Bizkaian baieztatu zituzten kasu berri gehien: 206. Nafarroan 117 zenbatu zituzten, Gipuzkoan 114 eta Araban 110.

Ospitaleetako egoerari dagokionean, berriz, datuak gorabeheratsuak dira. Atzo 48 lagun ospitaleratu zituzten Arabako, Bizkaiko eta Gipuzkoako erietxeetan, aspaldiko gehien, baina Zainketa Intentsiboetako Unitateetan dagoen herritarren kopuruak jaitsiera adierazgarria izan du: 81 daude egun, eta bederatzi gehiago zeuden bezperan. Guztira koronabirusa duten 321 lagun daude ospitaleratuta Osakidetzaren mendeko erietxeetan.

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide