Eusko Jaurlaritzaren Osasun Sailak azken hiru egunetako positibo kopuruen emaitzak plazaratu ditu, eta azken asteetako daturik baikorrenak izan dira Urola Kostan. Izan ere, ostiraletik igandera bitartean hamalau herritarrek bakarrik eman zuten positibo eskualdean egin ziren PCR eta antigeno probetan, joan zen asteko asteburuan baino bederatzi pertsona gutxiagok, hain justu. Daturik esanguratsuena da gaur-gaurkoz ez dagoela eskualdeko herririk eremu gorrian.
Ostiralean kasu bat zenbatu zuten Azpeitian, larunbatean bi eta atzo bat ere ez. Astebetean nabarmen egin dute behera positiboek herrian, eta gaur-gaurkoz 420,50ekoa da intzidentzia tasa. Joan zen astelehenean 873,85ekoa zen tasa, eta eremu gorrian zegoen herria; beraz, jaitsiera agerikoa izateaz gain datu baikorra da Azpeitikoa, hainbat aste eremu gorrian egon ostean eremu laranjara igaro baita.
Eskualdean, azken hiru egunetan positibo gehien Zarautzen hauteman dituzte, sei —ostiralean bi, herenegun hiru eta atzo bat—, eta 100.000 biztanleko hamalau egunetako tasa 316,9 da uneotan. Joan zen astelehenean 329,81eko tasa zuten herri hartan; beraz, tasak apur bat behera egin du astebetean. Kasurik gehien zenbatu dituzten eskualdeko bigarren herria Azpeitia izan da;
Orion ere duela astebete baino emaitza baikorragoak izan dira; izan ere, hiru egunetan kasu bakarra zenbatu dute bertan. Eremu gorritik laranjara igaro da Orio ere, eta gaur-gaurkoz 472,93 da hango intzidentzia tasa. Beraz, nabarmen jaitsi da tasa astebetean, joan zen astelehenean 1.288,32koa baitzuen.
Azken hiru egunetan kasu positiboak egon diren beste herriak Azkoitia, Errezil, Zestoa eta Zumaia izan dira. Herri horietan positibo bana zenbatu dute ostiraletik igandera bitartean. Azkoitia da eskualdeko 5.000 biztanletik gorako herrietan intzidentzia tasarik baxuena duen herria; 166,90 da hango tasa eta eremu horian dago. Bestalde, Zumaia ere eremu horian dago 213,70eko tasarekin; horrez gain, Zestoan 487,93ko tasa dute eta Errezilen 161,03koa. Aian, Aizarnazabalen Beizaman eta Getarian ez da kasurik izan azken hiru egunetan.
Hego Euskal Herrian, hobera
Osakidetzak eta Osasunbideak emandako datuen arabera, Hego Euskal Herrian ere positiboen kopurua beheranzkoa izan zen atzo. Araban, Bizkaian eta Gipuzkoan, guztira, 418 kasu zenbatu zituzten, horietatik 270 Bizkaian izan ziren, 91 Gipuzkoan, 51 Araban eta sei hiru lurralde horietatik kanpo. Guztira, 7.550 PCR eta antigeno proba egin zituzten atzo hiru lurralde horietan, eta positibotasun tasa %5,5ekoa da. ZIUetan, berriz, 170 pertsona daude ospitaleratuta gaur-gaurkoz, eta, atzo, 38 ospitaleratze izan ziren Osakidetzan.
Nafarroan, berriz, 1.202 PCR eta antigeno proba egin ziren atzo eta 48 pertsonak eman zuten positibo. Joan zen uztailaren 30etik lurralde historiko horretan hautematen duten daturik apalena da atzokoa, eta %4ko positibotasun tasa dute uneotan.