Urola Komunikazio Taldeko (UKT) Uztarria eta Maxixatzen hedabideek porra antolatu dute larunbateko Bartzelona-Juaristi ISB Zilarrezko LEB Kopako finalaren harira. Partida 16:30ean jokatuko dute Bartzelonako Ciutat Esportiva Joan Gamper kantxan. Espainiako Saskibaloi Federazioaren sare sozialetan eskainiko dute finala zuzenean.
Porran parte hartzeko honako galdera honi erantzun behar zaio: Nola bukatuko da Bartzelonaren eta Juaristi ISBren arteko finala?
Porran parte hartu nahi dutenek larunbateko 14:00ak arteko epea izango dute horretarako aukera, honako lotura honetan. Emaitza asmatzen duten parte-hartzaileen artean, ISBk emandako motxila bat eta Azpeitiko Txintxu gozotegian bi lagunentzako gosaria zozkatuko dituzte Uztarriak eta Maxixatzenek. Partida bukaerako emaitza zehatza inork asmatuko ez balu, porrako parte hartzaile guztien artean egingo da zozketa. Bi hedabide horiek partida amaitu bezain laster egingo dute zozketa, eta orduan jakinaraziko dute zein izan den porraren irabazlea.
Parte hartu, eta zorte on!