Koronabirusa Azpeitian

Positibo kopuruak gora egin du Gipuzkoan

5.810 PCR eta antigeno proba egin zituzten atzo Hego Euskal Herrian, eta 436 positibo zenbatu zituzten. Nafarroan %8tik %6,8ra jaitsi da PCR eta antigeno probetan positibo emandako herritarren ehunekoa herenegundik atzora. Beste hiru lurraldeetan, berriz, %7,3tik %7,7ra igo da. 138 positibo zenbatu zituzten atzo Gipuzkoan, eta 95 izan ziren herenegun.

5.810 PCR eta antigeno proba egin zituzten atzo Araba, Bizkai, Gipuzkoa eta Nafarroan, eta aurreneko hiru lurraldeetan 370 positibo zenbatu zituzten (%7,7) eta Nafarroan, berriz, 66 (%6,8). Azken lurralde horretan behera egin du positibotasun tasak azken orduetan, %8tik %6,8ra. Beste hiru lurraldeetan, berriz, goraka jarraitzen du, herenegun %7,3koa baitzen tasa hori. Azken sei egunetan goraka doa etengabe (%6 zen duela astebete).

Lurraldeei dagokienez, 72 positibo zenbatu zituzten atzo Araban, 152 Bizkaian, 138 Gipuzkoan, beste erkidego batzuetan zortzi kasu, eta Nafarroan 66.

Herenegun antzeko proba kopurua egin zuten lau lurraldeetan; 5.426 proba, guztira. Orduan 80 positibo atzeman zituzten Araban, 119 Bizkaian, 95 Gipuzkoan eta beste erkidego batzuetako zortzi kasu ere zenbatu zituzten. Nafarroan 103 izan ziren positiboak; atzokoaren aldean, asko.

Osakidetzak bihar emango ditu herriz herrikako azken egunetako datuak. Ikusteko dago Azpeitian eta Aizarnazabalen jaitsi ote den intzidentzia metatuaren tasa, bi herri horietan itxita daudelako ostalaritza guneak, eta Aizarnazabalen, baita udal eraikin eta zerbitzu batzuk ere, udalaren erabakiz.

Ospitaleen egoerari dagokionez, COVID-19aren ondorioz 28 pertsona ospitaleratu zituzten atzo Osakidetzako zentroetan, eta COVID-19a duten 79 pertsona daude ZIUn.

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide