Munategiko biribilgunea egiteko lanak, amaitzear

Munategiko biribilgunea.

Uztailean hasi ziren obrak, eta duela egun gutxi amaitu dituzte lanik handienak. 499.112,56 euroko aurrekontua izan dute lanek.

Amaitu dituzte Munategiko biribilgunea egiteko lanak. Uztailean hasi zituzten ingurua egokitzeko obrak, eta lanak egin dituzten gunean azken ukituak falta baldin badira ere, normaltasunez gidatu daiteke dagoeneko biribilgunean zehar.

Munategi parean ordu jakinetan sor daitezkeen "auto ilarak saihesteko" eta "puntu beltza" izanik "segurtasuna bermatzeko" egin du proiektua Aldundiak. Biribilgune berriak 42 metroko diametroa du eta hiru adar izango ditu: Basarte industrialdea, Azkoitia eta Azpeitia. Gainera, autobusentzat ere bi geltoki egokituko dituzte. Munategi aurreko baserrietara joateko, berriz, bidea marraztu dute errepidean, eta gunea oinezkoentzat eta txirrindularientzat ere egokituko dute datozen egunetan. 

Gipuzkoako Foru Aldundiak iazko martxoan jakinarazi zuen Basarteko bidegurutzean biribilgunea egingo zuela. Horren haritik, Aldundiko Diputatuen Kontseiluak joan zen ekainean onartu zuen Azkoitia eta Azpeitia artean dagoen Basarte poligonoaren bidegurutzean biribilgunea egiteko proiektua, eta Excavaciones Peru enpresak egin ditu lanok. Obraren aurrekontua 499.112,56 eurokoa izan da, BEZa barne.

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide