Bigarren eta azken astean sartu da Euskaraldiaren bigarren edizioa, eta euskararen erabilera sustatzeko ariketa sozialean parte hartzen ari diren herriko entitateek beren sostengua adierazten jarraitzen dute.
Aurreko astean Lagun Onak futbol klubak, Iraurgi Saskibaloiak, Azpeitiko Ikastola Karmelo Etxegaraik eta Iraurgi Ikastetxeak egin bezala, joan den asteburuan Lagun Onak Mendi Bazkunak, Ikasberri Kirol Elkarteak eta Juan Antxieta Musika Eskolak ere Euskaraldiari babesa azaltzeko argazkiak atera dituzte; mendizaleek, gainera, deialdi irekia egin zuten, atzo Xoxoten Euskaraldiaren aldeko argazkia atera nahi zuten herritarrei beraiekin bat egiteko gonbita eginez.