Koronabirusa Azpeitian

Egungo neurri murriztaileei abenduaren 10era arte eutsiko die Eusko Jaurlaritzak

Gotzone Sagardui, gaurko agerraldian. (Irekia)

LABIaren bileraren ondoren eman du erabakiaren berri Gotzone Sagardui Osasun sailburuak. Transmisioa oraindik "oso altua" den arren, indarrean dauden neurriak "erangikorrak" direla deritzo Jaurlaritzak.

Euskadiko Babes Zibileko Planaren aholku batzordeak —LABI— bilera egin du gaur arratsaldean, koronabirusaren izurritearen kontra hartutako azken neurrien eraginkortasuna aztertzeko, eta beharko balitz, neurri berriak ezartzeko. 

Duela minutu batzuk, Gotzone Sagardui Eusko Jaurlaritzako Osasun sailburuaren agerraldia izan da, eta bileran landutakoaren gaineko adierazpenak eman ditu. Adierazi duenez, indarrean jarraituko dute abenduaren 10era arte oraingo neurri murriztaileek, azaroaren 5ean onartutakoek.

Osasun sailburuaren esanetan, neurriak "eragin positiboa" ari dira izaten, eta hori "azken egunetako joera aldaketan atzematen da". Orain artean hartu dituzten erabakiak "onak" direla iritzi dio Sagarduik, egoera epidemiologikoaren larritasunaren araberakoak. Gizarteak neurrien aurrean emandako "erantzun onari" ere egin dio erreferentzia. 

Dena den, oraindik birusaren transmisioa "oso altua" eta ospitaletako presioa "handia" delako, neurriei eustea erabaki du Batzorde Teknikoak, herritarren mugikortasuna eta gizarte harremanak ahalik eta gehien murrizteko helburuarekin. Izan ere, Biziberri II Planean aurreikusitako bosgarren mailan daude Araba, Bizkaia eta Gipuzkoa, hau da, transmisio egoera oso handian.

Hori dela eta, izurriteari aurre egiteko "beste ahalegin bat" eskatu dio sailburuak gizarteari.

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide