Euskal Antzerki Topaketak 2020

'Tribiz, baserri galdue', 'Antigone edo ezetzaren beharra' eta 'Pinocchio' antzezlanak, topaketen hirugarren asterako

Jon Ander Urresti.

Gaur, osteguna, bihar eta etzi izango dira emanaldiak. Aurtengo edizioko azken hiru antzerki saioak izango dira, azaroaren 20an bukatuko baitira Topaketak, sari banaketarekin. Emanaldietarako sarrerak salgai daude Azpeitiko Udalaren webgunean; biharko emanaldirako sarrerak agortuta daude dagoeneko.

Pandemiak baldintzatuta eta antolatzaileek zein antzerkizaleek nahi baino gorabehera gehiagorekin, baina badoaz aurrera XXXVIII. Euskal Antzerki Topaketak. Hirugarren astea da honakoa, eta gaur, bihar eta etzi hiru emanaldi izango dira herrian. Aurtengo topaketetan ikusi ahal izango diren azken antzezlanak izango dira gainera; izan ere, azaroak 20an bukatuko da aurtengo edizioa, sari banaketarekin.

Gaur, osteguna, izango da aste honetako lehendabiziko emanaldia. Helduei zuzendutako Tribiz, baserri galdue obra taularatuko du Jon Ander Urrestik, Dinamoa sormen gunean, 19:30ean hasita.

Bihar, ostirala, berriz, Horman Poster taldearen Antigone edo ezetzaren beharra lana bertatik bertara ikusteko aukera egongo da Soreasu antzokian, 19:30ean hasita. Helduei zuzendutako antzezlana da hori ere, eta Xanti Agirrezabala herritarrak parte hartzen du. Emanaldi horretarako sarrerak agortuta daude dagoeneko.

Aste honetako hirugarren eta azken emanaldia larunbatean izango da. Umeei zein helduei zuzendutako Pinocchio lana taularatuko dute Gorakada Teatroako kideek. Soreasu antzokian izango da hori, 17:00etan hasita. Hiru emanaldietarako sarrerak honako lotura honetan eros daitezke. Igandean ematekoa ziren Zestoako Eromen Produkzioaken Guateke obra bertan behera utzi behar izan zuten, baina topaketak hasterako jakinarazi zuten hori. 

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide