Bertan behera utzi dituzte jubilatuen eta pentsiodunen astelehenetako elkarretaratzeak

Jubilatuen eta pentsiodunen elkarretaratze bateko irudia.

Koronabirusa tarteko "herrian bizi den egoera larriak" bultzatuta, astelehenetako elkarretaratzeak bertan behera uztea erabaki du Azpeitiko jubilatuen eta pentsiodunen elkarteak. Urriaren 31n Hegoaldeko hiriburuetan egitekoak ziren manifestazioak ere ez dituzte egingo.

Azpeitiko jubilatuen eta pentsiodunen elkarteak jakinarazi du bertan behera utziko dituztela oraingoz astelehenetako elkarretaratzeak. Astelehenero, 12:00etan, pentsio duinak aldarrikatzeko elkarretaratzeak egin ohi dituzte, baina COVID-19a tarteko "herrian bizi den egoera larriak" eraman ditu erabaki hori hartzera. "Jadanik indarrean diren arauak kontuan hartuz, ezinezkoa deritzogu hainbeste jende biltzeari", azaldu dute.

Horrez gain, urriaren 31n Hego Euskal Herriko lau hiriburuetan egitekoak ziren manifestazioak ere bertan behera gelditu dira. "Pandemiak onera egiten duenean, berriro aterako ditugu geure aldarrikapenak plazetara eta kaleetara".

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide