Aldaketak izango dira Landetan, Urrestillako bidegorriaren azken zatiko obrak tarteko

Etzi ekingo diote Azpeitia eta Urrestilla arteko bidegorria herri barruko bidegorri sarearekin lotzeko lanei. Udalak jakinarazi duenez, obrek hainbat aldaketa eragingo dituzte Landeta auzoan. Landeta etorbidetik Atxubiaga kalera arteko bidegurutzea itxita egongo da ibilgailuentzat, eta oinezkoentzako pasoa bermatzen saiatuko da udala. Horrez gain, Zubi Zahar kalea norazko bakarrekoa izango da, eta UK04 autobus linearen Atxubiaga kaleko geltokia Landeta etorbideko geltokira aldatuko dute. 

Urrestillako bidegorria herri barruko bidegorri sarearekin lotzeko obrak direla eta, hainbat aldaketa izango dira Landeta auzoan datozen hilabeteotan. Azpeitiko Udalak jakinarazi duenez, urriaren 1ean hasiko dira obrekin.

Udalak azaldu duenez, bidegorriaren lanak tarteko, Landeta etorbidetik Atxubiaga kalera arteko bidegurutzea itxi egingo dute ibilgailuentzat. Hala ere, oinezkoentzako pasoa bermatzen saiatuko da udala. Horrez gain,  Zubi Zahar kaleak norazko bakarra izango du obrek irauten duten bitartean, eta UK04 linearen Atxubiaga kaleko geltokia Landeta etorbideko geltokira aldatuko dute. Aldaketek sor ditzaketen enredoengatik udalak aurrez barkamena eskatu nahi izan die herritarrei. 

Bidegorriaren azken faseko obrek 189.085,64 euroko aurrekontua izango dute, eta hiru hilabeteko epean eginda izatea aurreikusten du udalak. 

Bidegorriaren lotura egitearekin batera, "trafikoaren ordenazioa hobetzeko hainbat aldaketa" ere egingo dituzte. Hori dela eta, GI-2635 errepideak noranzko bakarra izango du Landeta hiribideko bidegurutzetik aurrera, Azpeititik Urrestillako noranzkoan. Horrez gain, autobus geltokiak ere egokituko dituztela aurreratu du udalak. Hain zuzen, Landeta hiribidean jarriko dituzte autobus geltokiak, Mendizabal jatetxearen parean.

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide