634 kasu positibo berri hauteman dituzte Hego Euskal Herrian

Azken 24 orduetan, Hego Euskal Herrian behera egin dute SARS-CoV-2 birusa atzemateko PCR probetan positibo eman dutenak. Eusko Jaurlaritzak eta Nafarroako Gobernuak gaur emandako datuen arabera, denera 634 kasu positibo zenbatu dituzte azken orduetan.

Araban, Bizkaian eta Gipuzkoan 9.357 PCR proba egin zituzten atzo, ostiralean baino 557 gutxiago, eta 447 pertsonek eman dute positibo, herenegun baino 151 gutxiagok. Lurraldeka, Araban 68 kasu positibo baieztatu zituzten atzo, Bizkaian 227 eta Gipuzkoan 149; horiez gain, hiru lurraldeotatik kanpo bizi diren hiru lagunek ere positibo eman zuten. Atzo beste 25 lagun ospitaleratu behar izan zituzten COVID-19 gaitzareb ondorioz Araban, Bizkaian eta Gipuzkoan. Denera, 359 lagun daude gaitz hori dela-eta ospitaleetan, eta horietatik 53 Zaintza Intentsiboen Unitatean (ZIU) daude egun.

Udalerrietako datuak eta R0 indizearena ez ditu ematen asteburuetan jaurlaritzaren Osasun Sailak. Bihar, astelehena, eguneratuko ditu datu horiek erakundeak.

Nafarroan, bi pertsona hil dira koronabirusaren eraginez azken 24 orduetan, Osasunbideak gaur jakinarazi duenez; datuak zenbatzen hasi zirenetik, 557 hildako eragin ditu gaitzak Nafarroan. 2.319 PCR proba egin zituzten atzo, herenegun baino 514 gutxiago, eta 187 kasu positibo berri zenbatu zituzten, ostiralean baino 147 gutxiago; beraz, egindako probetatik %8,06k eman zuten atzo positibo. Azken orduetan hamar lagun ospitaleratu dituzte Nafarroako erietxeetan COVID-19ak jota, eta ZIUn 27 pertsona daude egun.

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide