Zapatuan egingo dute Ezkutuko Altxorrak egitasmoaren barruko azken bisita gidatua

Garbitokia, zapatuan bisitariek ezagutuko duten eraikinetako bat, parrokiako kanpandorrea atzean duela.

Azpeitia XVI. mendean izeneko txangoan, herriko Alde Zaharrak gordetzen duen garai hartako ondarea ezagutzeko aukera izango dute bisitariek. Bisita doakoa da, gehienez hamar lagunek parte har dezakete eta oraindik badago tokia. Ezkutuko altxorrak programan udako prestatutako azken hitzordua izango da asteburu honetakoa.

Azpeitia XVI. mendean izeneko bisita gidatuarekin bukatuko da, zapatu honetan, Ezkutuko Altxorrak programaren barruan uda honetarako Azpeitirako prestatutako egitaraua. Iraurgi Berritzen garapen agentziak Loiolako Turismo Bulegoaren bidez kudeatutako programa da Ezkutuko Altxorrak eta Urola Erdiko ondarea ezagutarazteko hamabost ekitaldi prestatu dituzte amaitzear den udarako, gehienak bisita gidatuak; uztailaren erdi aldean jarri zuten martxan egitaraua, eta datorren asteburuan bukatuko dute.

Zapatuko bisita gidatua 12:00etan hasiko da eta herriko Alde Zaharrak gordetzen duen XVI. mendeko ondarea ezagutzeko aukera izango dute bisitariek; hain zuzen ere, gai beraren bueltako beste bisita gidatu batekin hasi zen Ezkutuko Altxorren aurtengo egitaraua joan den uztailean.

Bisita doakoa da, gehienez hamar lagunek parte har dezakete eta oraindik badago tokia, baina aurrez izena ematea derrigorrezkoa da. Horretarako, 943-15 18 78 telefono zenbakira deitu edo i-loiola@urolaturismo.eus helbidera mezua idatzi behar da.

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide