Sanjuan denda oroitu dute Bertanek eta udalak haren 50. urteurrenean

Manolo eta Mikel Sanjuan, udalak eta Bertanek emandako oroigarriarekin. (Azpeitiko Udala)

Azpeitiko Udalak eta Bertan merkatari elkarteak urte guzti hauetan "merkataritzaren alde egindako lana" eskertu diete Sanjuan artisau dendako jabeei.

1970eko uztailaren 25ean ireki zuen Sanjuan artisau denda Manolo Sanjuanek, eta 50 urte bete zituen joan zen uztailean. Hori dela eta, Azpeitiko Udalak eta Bertan merkatari elkarteak azken urteetan "merkataritzaren alde egindako lana" eskertu nahi izan diete Manolo eta Mikel Sanjuan aita-semeei, eta udalaren oroigarria eman diete Agustin Lizarralde udaleko zinegotziak eta Xabier Aldalur Bertanen teknikariak.

"50 urtean herriko merkataritza sustatzeko egindako lana eskertu nahi diegu horrelako urteurren borobilean. Herriari horrelako merkatari txikiek ematen diote bizia, eta orain arte bezala herria bizirik mantentzeko ahaleginean segitzeko eskatu nahi dizuegu", nabarmendu du Lizarraldek.

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide