Munategiko biribilgunea egiteko lanak esleitu ditu Gipuzkoako Foru Aldundiak

Excavaciones Peru enpresak egingo ditu biribilgunea eta ingurua egokitzeko lanak. Lanak lau hilabetean gauzatzea aurreikusten du Aldundiak, baina ez du jakinarazi noiz hasiko dituzten. Lanok eginda, Munategi parean ordu jakinetan sortzen diren auto ilarak saihestuko direla adierazi du erakundeak.

Gipuzkoako Foru Aldundiako Diputatuen Kontseiluak joan zen ekainean onartu zuen Azpeitia eta Azkoitia artean dagoen Basarte poligonoaren bidegurutzean biribilgunea egiteko proiektua, eta dagoeneko esleitu ditu lanak. Excavaciones Peru enpresak egingo ditu lanok, eta obraren aurrekontua 411.268,65 eurokoa (BEZ barne) izango da. Lanak lau hilabetean gauzatzea aurreikusten du Aldundiak, baina ez du jakinarazi noiz hasiko dituzten.

Biribilgunea eginda eta ingurua egokituta, Munategi parean ordu jakinetan sor daitezkeen auto ilarak saihestuko direla adierazi du erakundeak, "puntu beltza" izanik segurtasuna bermatu nahi duelako. Biribilguneaz gain, gunea oinezkoentzat ere egokituko dute; izan ere, gaur egun inguru horretan ez dago zebrabiderik. Gainera, autobusentzat ere egokituko dute eremua, gaur egun errepidetik atera behar izaten dutelako horiek geldialdia egiteko, eta Azpeitirakoan, Txerloiko biribilgunera joan behar izaten dutelako buelta hartzera.

Urteak dira Azpeitiko eta Azkoitiko udalak nahiz Basarte industrialdeko enpresak gune horretan sortzen diren trafiko arazoei irtenbidea emateko eskatzen ari direla. Aldundiak. Gipuzkoako Foru Aldundiak iazko martxoan jakinarazi zuen Basarteko bidegurutzean biribilgunea egingo duela.

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide