Koronabirusa Azpeitian

San Martin egoitzako egoiliarrak bisitatu ahal izango dituzte senideek bihartik aurrera

Bihartik aurrera, astean behin, senide berak bisitatu ahal izango du familiakoa duen egoiliarra. Egoitzan lau gune prestatu dituzte bisitetarako, eta hainbat neurri hartuko dute segurtasuna bermatzeko. Eguneko zentroa ere bihar zabalduko dute.

Denbora luzez senitartekoak bertatik bertara ikusi gabe izan dira San Martin egoitzako adinekoak. Azkenaldian, hesiaren bestaldetik bisitatu dituzte senideek, eta bihartik aurrera, hirugarren fasean sartzearekin bat, ohiko bisitak berreskuratzen hasiko dira, neurri bereziak hartuta.

Bihartik aurrera, beti senide berak bisitatu ahal izango du egoiliarra, astean behin. Beheko solairuan, lau gune prestatu dituzte bisitetarako. Kaperako sarrerako atetik joan beharko dute bisitariek gune horretara; Estrata kaletik, alegia. Senideek maskara jantzita joan beharko dute egoitzara, eta NAN zenbakia eskatu eta tenperatura hartuko diete. Egoitza senideekin harremanetan jarriko da, txanden bidez, bisitak antolatzeko.

Eguneko zentroa ere bihar zabalduko dute. Haiek ere segurtasun neurriak hartuko dituzte COVID-19 gaitzaren hedapena saihesteko.

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide