Koronabirusa Azpeitian

Ikastetxeen irekiera maiatzaren 25era atzeratu du Jaurlaritzak

Azpeitiko Ikastola Ikasberriren eraikina.

Jaurlaritzak datorren astelehenean nahi zituen ireki Arabako, Bizkaiko eta Gipuzkoako ikastetxeak, baina zabaltzeko epea astebete atzeratzea erabaki du. Erabakiak zalaparta eragin du hezkuntza komunitatean, eta gainera, Espainiako Gobernuaren lehen faseko dekretuan ez dago jasota eskolen irekierarik.

Ikastetxeen irekiera epea astebetez atzeratzea erabaki du Eusko Jaurlaritzak, eta beraz, maiatzaren 25etik aurrera hasiko dira eskolak ematen Arabako, Bizkaiko eta Gipuzkoako hezkuntza zentroetan. Konfinamendua arintzeko lehen fasean Espainiako Gobernuak ez du jaso ikastetxeen irekieraren gaineko xehetasunik, eta Jaurlaritzak ere ez du irekitzeko erabakirik hartu. Dena den, ikusteko dago hilaren 25ean irekitzeko aukera izango den edo ez.

Hasiera batean datorren astelehenean, maiatzaren 18an, nahi zuen hezkuntza jarduna berriz hastea Jaurlaritzak, baina gaur jakinarazi du astebete atzeratuko duela data hori. Dena den, borondatezkoa izango da irekiera, eta ikastetxe bakoitzak hartu beharko du erabakia. Jaurlaritzak jakinarazi duenez, Cristina Uriarte Hezkuntza sailburuak dagoeneko bidali die erabakiaren berri emateko gutuna ikastetxeei.

Josu Erkoreka Eusko Jaurlaaritzaren bozeramaileak jakinarazi duenez, eskola komunitatean "arazo gehiago" ez sortzeko nahiz "argitasuna eta segurtasuna emateko" hartu dute erabakia. "Kontuan hartu behar da oraindik ez dugula Madrildik jaso zehaztapen juridikoa,  eta erabaki dugu maiatzaren 25ean hasiko dela eskoletara itzultzeko dinamika guztia".

Maiatzaren 7an iragarri zuen Cristina Uriarte Hezkuntza sailburuak maiatzaren 18an ikasgeletara itzuliko Zirela Batxilergoko bigarren mailako ikasleak eta Lanbide Heziketako goi mailako zikloetako bi mailetakoak eta erdi mailako eta oinarrizko mailako bigarren mailakoak; eta maiatzaren 25ean, berriz, DBHko laugarren mailakoak, Batxilergoko lehen mailakoak eta Lanbide Heziketako erdi mailako zikloetako lehen ikasturtekoak.

Soka luzea ekarri du zuen eskolen irekieraren iragarpenak. Izan ere, sindikatuek haserrea adierazi eta baldintzak negoziatu nahi zituztela esan zuten, ikasle sindikatuak greba mugagabera deitu zuen eta hezkuntza eragile hainbatek zentroak 18an zabaltzearen aurkako jarrera azaldu zuen. Astelehenean, berriz, ikastetxeak irekitzea borondatezkoa izango zela jakinarazi zuen Jaurlaritzak. Egunotan eskualdeko ikastetxeekin harremanetan izan da Uztarria.eus, eta zentroetako zuzendariek zalantzak zituztela adierazi zuten.

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide