Koronabirusa Azpeitian

Baieztatutako lehen koronabirus kasua Azpeitian

Osakidetzaren azken datuen arabera, baieztatutako lehen koronabirus kasua izan da Azpeitian. Erakundeak, ordea, ez du zehazten zein den pazientearen egoera. Bailaran, guztira, 15 kasu daude: Zarautzen atzeman dituzte kasu gehien, 11; eta Azkoitian, Azpeitian, Getarian eta Zumaian, bana.

Koronabirusak jotako herritarren kopurua hazten ari da Euskal Herrian eta hazten ari da Urola Kostan ere. Gainera, Azpeitiko lehen koronabirus kasuaren berri eman du Osakidetzak; ez du zehazten, ordea, zein den pazientearen egoera. Eskualdean baieztatutako kasuak zazpi ziren atzo—Zarautzen sei eta Getarian—; gaur, berriz, hamabost. Gehienak Zarautzen daude, 11; eta bana daude Azkoitian, Azpeitian, Getarian eta Zumaian. Horiek dira gaur eguerdian Eusko Jaurlaritzak eman dituen datuak, baina benetako kutsatuen kopurua handiagoa izan daiteke.

Euskal Herrian, berriz, gutxienez, COVID-19 gaitzak jotako 2.065 herritar daude —atzo baino 386 gehiago—, eta 78 lagun hil dira, horietatik hogei azken 24 orduetan.

Egunero bezala, Eusko Jaurlaritzak gaur ere eman ditu koronabirus kasuen inguruko datu eguneratuak. Atzotik 275 kasu berri atzeman dituzte Araban, Bizkaian eta Gipuzkoan. Guztira, 1.465 lagun daude kutsatuta hiru lurralde horietan: 703 Araban –atzo baino 82 gehiago–, 539 Bizkaian –atzo baino 146 gehiago– eta 223 Gipuzkoan –atzo baino 47 gehiago–. 550 daude erietxeetan, eta atzoz geroztik, hemezortzi pertsona hil dira: guztira, 71 dira zendutakoak –48 Araban, hamazazpi Bizkaian, sei Gipuzkoan bost.

Nafarroan, berriz, 593 dira gaitzak jotako herritarrak, atzo baino 111 gehiago. Azken 24 orduetan hildako bat izan da Nafarroan, eta guztira sei dira koronabirusagatik hil direnak. Han, 195 lagun daude erietxean. Aldiz, Ipar Euskal Herriko datuak ez dira zehatzak: Frantziako osasun sistemak eskualde administratiboen araberako datuak ematen ditu —Pirinio Atlantikoetan hogei gaixo atzeman dituzte—, baina ez da posible probintziaka bereiztea. Jakin da, hala ere, gutxienez zazpi eri eraman dituztela Baionako erietxera, Lapurdin; Zuberoako gaixoak Pauko ospitalera eramaten dituzte, eta han hil da zuberotar bat.

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide