Urrezko Aizkolarien Kopako finalerdia jokatuko dute igandean Urrestillan

Igandeko Urrezko Aizkolarien Kopako finalerdian Mikel Larrañaga eta Jon Rekondo ariko dira nor baino nor, Txikuri pilotalekuan. Horrez gain, Gabonetako Emakumeen Ingude Kopako eta Gabonetako Harri-jasotze Kopako jardunaldi bana jokatuko dituzte.

Herri kiroletako hiru txapelketatako jardunaldi bana jokatuko dute igandean, 12:30ean hasita, Urrestillako Txikuri pilotalekuan. Urrezko Aizkolarien Kopa Eusko Label Saria txapelketako finalerdia jokatuko dute Mikel Larrañaga aizkolari azpeitiarrak eta Jon Rekondo aizkolari leitzarrak. Horiek egin beharreko lana hamabina kana-erdiko ebakitzea izango da. Txapelketaren finala abenduaren 31n jokatuko dute Asteasun (Gipuzkoa). Dagoeneko erabakita dago finalistetako bat: Julen Alberdi Txikia V.a azkoitiarra. Joan zen asteburuan Eneko Otaño beizamarraren kontrako finalerdia irabazi zuen hark Mendaron (Gipuzkoa).

Aizkolarien finalerdiaz gain, Gabonetako Emakumezkoen Ingude Kopako jardunaldia ere izango da igandean Urrestillan: Nerea Egurrolak eta Virginia Finolek jokatuko dute. Gabonetako Harri-jasotze Kopako saioan, berriz, Beñat Telleria eta Mateo Coloma harri-jasotzaileek neurtuko dituzte indarrak. Lanerako hiru harri izango dituzte: 100 kiloko zilindro zaharra, 100 kiloko kubikoa eta 100 kiloko bola.

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide