Gorka Malo gorren artean txapelduna izan da Behobia-Donostian

Atzo, igandea, jokatu zuten hain ezaguna den Behobia-Donostia 20 kilometroko lasterketa. Giro makurra izan zuten parte hartzaileek, euria, txingorra eta hotza. Chakin Lachgar (1:00:57) eta Gema Barrachina (1:11:32) izan ziren probako txapeldunak. Desgaitasunen bat duten kirolarien sailkapenak ere osatu zituzten antolatzaileek, eta pertsona gorren artean, Gorka Malo azpeitiarra izan zen txapelduna. 01:12:54 denboran egin zuen proba hark, eta sailkapen orokorreko 221. postuan bukatu zuen lasterketa.

Guztira, 27.084 korrikalari irten ziren abiapuntutik, eta horietatik 25.479 lasterkarik zeharkatu zuten helmuga; azpeitiarrak ere izan ziren tartean. Aurten 89 azpeitiarrek bukatu dute lasterketa, eta horien artean Xabat Manzisidor izan da aurrena, 1:06:27 denborarekin. Lehen emakumea, berriz, Ane Alberdi izan da (1:21:34). Krux Guridik 25. aldiz jarraian egin du Behobia-Donostia lasterketa, eta aipamena jaso zuen horregatik. Guridik 02:08:59 denboran amaitu zuen lasterketa. 

Hemen Azpeitikoen sailkapena (izena ematean herriaren tokian 'Azpeitia' jarritakoak dira). 

Iaz 76 azpeitiarrek bukatu zuten proba.

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide