Udal, foru eta Europako hauteskundeak dira gaur, eta hainbat herritar ari da hiru horietarako botoa ematen. Goizetik izan da mugimendua herriko hemezortzi hauteslekuetan, baina Espainiako Barne Ministerioak 14:00etan jakinarazi ditu lehen parte-hartze datuak. Hain zuzen ere, Azpeitian herritarren %41,95ek eman dute udal hautetsiak aukeratzeko botoa 14:00etara bitartean; 4.714 herritarrek. 3,5 puntu igo da eguerdiko parte-hartze datua, 2015eko udal bozekin alderatuta; izan ere, orain dela lau urte erroldaren %38,45k eman zuen botoa 14:00etara arte. Bigarren parte-hartze datua 18:00etan jakinaraziko dute.
Foru hauteskundeetako datuak ez dituzte jakinarazi oraindik; Europakoak bai, ordea. Ikaragarri igo da Europako bozetako parte hartzea: %41.63 (4.675 boto). Eta horretan eragin zuzena izan du Europako hauteskundeak udal eta foru bozekin batera egiteak. Hain zuzen ere, %41,63 izan da gaur 14:00etarako Europako bozetako parte-hartzea. 2014an, berriz, % izan zen eguerdiko datua. Beraz, 15,84 puntu igo da parte-hartzea.
Azpeitian 11.237 herritarrek dute botoa emateko aukera, eta horiek 20:00ak arte izango dute horretarako aukera, orduan itxiko baitituzte hauteslekuak. Ondoren hasiko dira bozak kontatzen: lehenik Europako hauteskundeetakoak zenbatuko dituzte; herrietakoak gero; eta foru bozetakoak azkenik. Uztarria.eus-ek datuen berri emango du gaur egun osoan zehar, baita gauean ere.