75 landare sartu dituzte Goenan egindako Zuhaitz Egunean

Zuhaitz Eguna da gaur, otsailak 3, Azpeitian. Azken urteetan egin bezala, hainbat herritar zuhaitzak landatzen aritu da goizean zehar Goenako zelaian. Azpeitiko Udalak eta Ekoetxeak antolatu dute Zuhaitz Eguna, eta egitasmoarekin bat egin dute herriko ikastetxeek, Lagun Onak Mendi Bazkunak, Baigerak eta Lagun Onak Futbol Taldeak. Aurten, Goena ingurua aukeratu dute Zuhaitz Eguna egiteko, eta bertan elkartu dira egitasmoarekin bat egin duten herritarrak, 10:30ean. Guztira, 70 bat lagun elkartu dira Goenan, haur zein heldu, eta denen artean 75 zuhaitz landatu dituzte. Bi ordu inguruz aitzurrak astintzen ibili ostean, indarrak berreskuratzeko hamaiketakoa egin dute parte-hartzaile guztiek. 

Gizartea berdeguneen garrantziaz sentsibilizatzea eta ingurumenaren zaintzan herritarrak subjektu aktibo izatea dira Zuhaitz Egunaren helburu nagusiak. Azken hiru-lau urtetan 350 zuhaitzetik gora landatu ditu Udalak.

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide