'Cubanas. Mujeres en revolucion' dokumentala eskainiko dute ostegunean Emakumeen Txokoan

Emanaldia 18:30ean hasiko da, eta nahi duen oro bertara daiteke. Basanderiek asanbladak eta Askapenak antolatu dute proiekzioa. Azaldu dutenez, ikus-entzunezkoaren helburua da Kubako iraultzan emakumeek izan zuten "eragin zuzena" bistaratzea.  

Askapena antolakunde internazionalistak eta Basanderiek asanblada feministak antolatuta, Cubanas. Mujeres en Revolucion dokumentala eskainiko dute ostegunean, hilak 27, Emakumeen Txokoan, 18:30ean hasita. Ikus-entzunezkoak emakumeek Kubako iraultzan jokatutako rola aztertzen du, hamaika emakumeren testigantzak ardatz.

Emanaldiaren antolatzaileek azaldu dutenez, dokumentalaren xedea da Kubako iraultzan emakumeek izan zuten "eragin zuzena" bistaratzea: "Kubako iraultzaren kontaketaren nagusitasuna gizonek hartu dute, nahiz eta emakumeek ere ezinbesteko papera izan garaipenera eraman zituzten prozesu osoan. Nork ez ditu ezagutzen Fidel, Raul eta Che. Baina ez hainbeste Celia Sanchez edo Haydee. Hori da emakume iraultzaileen kondena: memoria eta iraultza ere gizonezko egin dituztela". Egoera hori irauli nahi dute Askapenak eta Basanderiekek, emakume iraultzaileek ere "merezitako aitortza" jaso dezaten. "Ostegunean omenaldi txiki bat egingo diegu Kuban egunerokoan borrokan dabiltzan emakume guztiei, blokeoaren aurka eta beste harreman eredu batzuei bide ematen".

Hona hemen trailerra:

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide