Rapido de Bouzas taldeak fitxatu du Alex Aizpuru azpeitiar futbolaria

Uztarria.eus 2017ko abe. 26a, 12:58
Alex Aizpuru 'Kaxe'. (Julene Frantzesena)
Espainiako Bigarren B Mailako taldea da Galiziakoa. Aizpuru han ariko da denboraldia bukatu bitartean. Beasainekin aritu da denboraldia hasi zenetik, eta Espainiako Hirugarren Mailako IV. multzoko pitxitxia izan da.

Denboraldi erdia Beasainen egin ostean, Rapido de Bouzas Galiziako taldeak fitxatu du Alex Aizpuru Kaxe (Azpeitia, 1994) futbolaria. Vigoko taldearekin ariko da azpeitiarra denboraldia bukatu bitartean. Aizpuruk Uztarria.eus-i jakinarazi dionez, "oso gustura" dago fitxaketarekin, "jokatzeko aukera eskaini" diolako Galiziako taldeak. Gaur da Galiziara joatekoa, eta gaur bertan aurkeztuko du taldeak azpeitiar jokalaria. Lehen entrenamendu saioa ere gaur egingo du Rapido de Bouzasekin.

Orain arte Espainiako Hirugarren Mailan jokatu du Kaxek, baina orain urrats bat egin du, eta Espainiako Bigarren B Mailan ariko da Rapido de Bouzasekin. Azpeitiarrak denboraldi erdi bikaina egin du Beasainekin; izan ere, Espainiako Hirugarren Mailako IV. multzoko pitxitxia izan da Kaxe.

Duela bi aste elkarrizketa egin zion Urola Kostako Hitzak azpeitiarrari.