Zortzi etapetan Azpeitia-Bilbo arteko ibilaldia prestatu du Lagun Onak MBk

Datorren urterako egitasmo berri bat prestatu du Lagun Onak Mendi Bazkunak: Azpeitia-Bilbo 2018 ibilaldia. Zortzi etapetan egingo dute mendizaleek zeharkaldi hori. "Azpeitia-Hazparne 2017 ibilaldia eredu hartuta antolatu dugu", esan du mendizale elkarteak.

Urtean zehar egiteko zortzi etapetan antolatu dute Azpeitia-Bilbo 2018 mendi egitasmoa Lagun Onak MBkoek. Aurrenekoa, urtarrilaren 13an egingo dute, Azpeitia-Deba artekoa. Aurten egin duten Azpeitia-Hazparne etapaz etapako ibilaldia izan dute oinarri: "Jendearen parte hartzea garrantzitsua izan da, eta jendeak antzeko zerbait antolatzeko eskatu digu. Guretzat, berriz, aurten izan dugun esperientzia kontuan hartuta, ez da zaila izan beste erronka bati heltzea", azaldu du Lagun Onak MBk. Esan du, horrelako irteera bat edo bestelakoren bat antolatzeak antzeko lana ematen diola elkarteari.

Zortzi etapa antolatu dituzte, denak 20-25 kilometro artekoak dira, eta GR eta PR izeneko ibilbideetan zehar egingo dituzte; "ahal den neurrian, Kantauriko kostari segika", zehaztu dute.

Azpeitia-Bilbo 2018ko etapak:

1- Azpeitia-Deba. 23,5 kilometroko ibilbidea. Urtarrilaren 13an, larunbata, egingo dute.

2- Deba-Lekeitio. 21 kilometroko ibilbidea. Otsailaren 24an, larunbata.

3- Lekeitio-Elantxobe. 21 kilometro. Martxoaren 17an, larunbata.

4- Elantxobe-Bermeo. 23 kilometro. Apirilaren 14an, larunbata.

5- Bermeo-Bakio. 18 kilometro. Maiatzaren 12an, larunbata.

6- Bakio-Plentzia. 23 kilometro. Ekainaren 16an, larunbata.

7- Plentzia-Getxo. 22 kilometro. Irailaren 15ean, larunbata.

8- Getxo-Bilbo. 17 kilometro. Urriaren 20an, larunbata.

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide