Hurrengo plazan elkartuko gara, Kontxu!

Bizitza irri, algara eta negar malkoek osatzen dute. Eta zuk, Kontxu, irri eta algara ugari sortu dizkiguzu zure paperen bidez. Baina utzi gaituzu, eta malkotik gertuago gaude algaratik baino. Triste dago Euskal Herriko antzerkigintza, telebista. Eta triste dago Azpeitia. Barre asko egin dugu Kontxurekin, barka, Maria Luisarekin. Serio-demonio, jenio biziz, aztoratzen zituen Hortentxi, Joxe Mari, Txapas... Aurrean jartzen zitzaion edonor. Boga-Bogako perrexila, Boga-Bogako erregina. Gure etxe askotan bezala, emakume osoa, etxeko motor, etxeko indar. Arraldeko Maria Luisa. Azpeitiko Kontxu.

Eta joan zaigu. Aktore handia, emakume maitagarria. Eta maitatua. Maria Luisa baino askoz sakonagoa. Azpeitiko Kontxu Odriozola. Azpeitiko antzerkigintza mugimendu oparoeneko partaide izan zinen, eta antzerkia Azpeitian denaren eta izan denaren sua piztu zenuten. Etxean, aitarekin bizi zenuen antzerkigintzaren printza, Milagrosako mojekin sortu zen txinparta. Eta ondoren sortu zenuen euskal antzerkigintzan sua. Emakume argia, ausarta eta indartsua. Eta hori ere miresten dugu. Ekintzailea, Azpeitiko Ikastolako lehenengo irakasleetakoa; dena utzi eta antzerkigintzara salto egiten ausartu zena.

Gure dolumin sentikorrena familiari eta lagunei. Baina, aurrera egin beharra dago, aurrera indarrez, konpromisoz eta lanez. Azkena gurekin izan zinenean, Azpeitiko udaletxeko balkoian festetako txupinazoan bezala, gaitz guztiak tapatu eta dotore, irribarre ederrena erakutsiz, bizitzaren une latzenetan ere.

Lasaitasunez egin dezakezu barre, Kontxu. Maskara kendu eta lasaitu ederra hartzeko unea iritsi zaizu, denoi iritsiko zaigun gisa. Eta orain, zure begietara begiratzen dugu, zuk utzitakoari so egiten diogu, eta harro gaude: herri honekin, gure kulturarekin, gure hizkuntzarekin konpromisoa eta lan handia utzi duzulako atzean. Zure hoberena geratzen zaigu; eta, guk ere, irribarrez balore horietan oinarrituta egingo dugu aurrera. Zure eredua gurea da, azpeitiar guztiona. Asteburu luze honetako barre eta algarak zuretzat Kontxu. Funtzioak eta herri zahar honek jarrai dezala.

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide