Gaur egungo kazetaritzaz mahai-ingurua antolatu du Uztarriak astearterako

Enekoitz Esnaola Berria-ko kazetaria, Lander Arbelaitz Argia-ko kazetaria, Nekane Zinkunegi Info7-ko kazetaria eta Luistxo Fernandez Codesyntax enpresako kidea izango dira hizlariak. 19:30ean hasiko da solasaldia, Sanagustin kulturgunean. Erlo telebistak streaming bidez zuzenean emango du mahai-ingurua.

15 urte bete ditu Uztarria Azpeitiko herri aldizkariak hilabete honetan. Horren harira, eta kazetaritzak urteotan izan dituen aldaketak-eta kontuan hartuta, Uztarria Komunikazio Taldeak mahai-ingurua prestatu du datorren astearterako, hilak 25.  

Kazetaritza gaur egun. Komunikatzeko moduak, tresnak, subjetuak... izenburupean izango da solasaldia 19:30ean hasita, Sanagustin kulturgunean. Enekoitz Esnaola Berria-ko kazetaria, Lander Arbelaitz Argia-ko kazetaria, Nekane Zinkunegi Info7-ko kazetaria eta Luistxo Fernandez Codesyntax enpresako kidea izango dira hizlariak. Moderatzaile lanak, berriz, Eneritz Albizu Uztarriako kazetariak egingo ditu. Erlo telebistak streaming bidez zuzenean emango du mahai-ingurua eta atari honetan, Uztarria.com-en, ere ikusi ahal izango da zuzenean.

Bestalde, Uztarriak kaleratzen dituen bestelako produktuen 25.a aurkeztuko du Uztarriak hilaren 27an, osteguna, Sanagustin kulturgunean, 19:00etatik aurrera: Mugarria ikus-entzunezkoa, hain zuzen. Yuri Agirre azpeitiar kazetariak egin du ikus-entzunezkoa.

Uztarriaren azaroko zenbakian aldizkariaren 15. urteurrenaz eta 25. produktuaz egindako erreportajea irakurri daiteke.

Hemen 'Mugarria'-ren aurrerapen bideoa.

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide